ഡൽഹി: തൊഴിലാളി വിരുദ്ധ നയങ്ങള്ക്കെതിരെ ഡിസംബർ ഒന്നിന് സി ഐ ടി യു പാർലമെന്റ് മാർച്ച് നടത്തുമെന്ന് ജനറല് സെക്രട്ടറി എളമരം കരീം.
തൊഴിലാളികള് നേരത്തെ നടത്തിയ സമരങ്ങളെ വെല്ലുവിളിച്ച് കേന്ദ്ര സർക്കാർ നടപടികളുമായി മുന്നോട്ട് പോകുന്ന പശ്ചാത്തലത്തിലാണ് പ്രക്ഷോഭമെന്ന് അദ്ദേഹം വ്യക്തമാക്കി.
ലേബർ കോഡ്, തൊഴിലാളി സംഘടനകള്ക്ക് എതിരായ കേന്ദ്ര നയങ്ങള്, മിനിമം വേതന തത്വത്തിന് എതിരായ നടപടികള്, കരാർ തൊഴിലാളിവത്ക്കരണം എന്നിവയ്ക്ക് എതിരെയാണ് സമരമെന്ന് സി ഐ ടി യു ജനറല് സെക്രട്ടറി വിവരിച്ചു.
ഇക്കാര്യങ്ങള് ഉയർത്തി ഡിസംബർ ഒന്ന്, രണ്ട് തീയതികളില് ഡൽഹിയില് കേന്ദ്രീകരിച്ച് വൻ പ്രതിഷേധം സംഘടിപ്പിക്കുമെന്നും അദ്ദേഹം കൂട്ടിച്ചേർത്തു.
കരാർ തൊഴിലാളിവല്ക്കരണത്തിനും തൊഴിലാളി വിരുദ്ധ നീക്കങ്ങള്ക്കുമെതിരെ നടക്കുന്ന ഈ പ്രതിഷേധത്തില് രാജ്യത്തെ എല്ലാ സംസ്ഥാനങ്ങളില് നിന്നുമുള്ള തൊഴിലാളികള് അണിനിരക്കുമെന്നും എളമരം കരീം വ്യക്തമാക്കി.
