കൊല്ലം: മോട്ടോര് വാഹന നിയമങ്ങള് കാറ്റില്പ്പറത്തിക്കൊണ്ട് എംഎല്എയും മന്ത്രിയുടെ പേഴ്സണല് സ്റ്റാഫും കാറില് യാത്ര ചെയ്ത സംഭവത്തില് ഖേദപ്രകടനവുമായി സി.ആര് മഹേഷ് എംഎല്എ.
എന്റെ ഭാഗത്ത് നിന്ന് അങ്ങനെ ഒരു പിഴവ് ഉണ്ടായി. ഞാന് ഖേദം പ്രകടിപ്പിക്കുന്നു. പലര്ക്കും അറിഞ്ഞും അറിയാതെയും ട്രാഫിക്ക് നിയമങ്ങളില് പിഴവ് ഉണ്ടാവാറുണ്ട്. പ്രത്യേകിച്ച് ജനപ്രതിനിധികളുടെ ഭാഗത്തു നിന്നും അങ്ങനെ ഉണ്ടാകുവാന് പാടില്ല -എംഎല്എ ഫേസ്ബുക് പോസ്റ്റില് പറഞ്ഞു.
'നിയമസഭാ തെരഞ്ഞെടുപ്പിന് മുന്പ് പുതുപ്പള്ളി പള്ളിയില് ഉമ്മന്ചാണ്ടി സാറിന്റെ കല്ലറയില് പോകുന്ന വഴിക്കാണ് പിഴവ് സംഭവിച്ചതെന്ന് ഞാന് ഓര്ക്കുകയാണ്. തെരഞ്ഞെടുപ്പില് മത്സരിച്ച സമയത്ത് ഇങ്ങനെയുള്ള കേസുകളുടെ എല്ലാം പിഴ അടച്ചു എന്നതാണ് എന്റെ ഓര്മ്മ. ഇല്ലാ എങ്കില് പിഴ അടക്കുവാനും തെറ്റ് ആവര്ത്തിക്കാതെ ഇരിക്കാനും ശ്രദ്ധിക്കുന്നതാണ്. ഈ സംഭവം വിഷ്വല് മീഡിയകളില് വാര്ത്ത വന്നതുകൊണ്ടാണ് ഈ കുറിപ്പ് എഴുതുന്നത്' -സി.ആര് മഹേഷ് പറഞ്ഞു.
സി.ആര് മഹേഷിന്റെയും മന്ത്രി ഒ.ജെ ജനീഷിന്റെ പേഴ്സണല് സ്റ്റാഫ് അംഗം ജെയ്സണ് ജെയിംസിന്റെയും കാര് യാത്രയുടെ വീഡിയോ സമൂഹഹമാധ്യമങ്ങളില് വ്യാപക വിമര്ശനത്തിനിടയാക്കിയിരുന്നു. വാഹനംഡ്രൈവ് ചെയ്യുന്ന ജെയ്സണ് ജെയിംസ് തന്നെയാണ് മൊബൈല് ഫോണില് ദൃശ്യങ്ങള് പകര്ത്തിയത്. ജെയ്സണും കൂടെ മുന്സീറ്റിലിരുന്ന സി.ആര്. മഹേഷും സീറ്റ് ബെല്റ്റ് ധരിച്ചിരുന്നില്ല. 12 സെക്കന്ഡ് ദൈര്ഘ്യമുള്ള വീഡിയോ സിനിമ പാട്ടിന്റെ പശ്ചാത്തല സംഗീതം ചേര്ത്ത് ഇന്സ്റ്റാഗ്രാമിലും ഫേസ്ബുക്കിലും റീല്സായി പോസ്റ്റ് ചെയ്യുകയായിരുന്നു. ഇതോടെയാണ് വ്യാപക വിമര്ശനം നേരിട്ടതും എംഎല്എ ഖേദം പ്രകടിപ്പിച്ചതും.
സി.ആര് മഹേഷിന്റെ പോസ്റ്റ്...
പ്രിയപ്പെട്ടവരെ...
സീറ്റ് ബെല്റ്റ് ഇടാതെ യാത്ര ചെയ്യുന്നത് നിയമവിരുദ്ധമാണ്. എന്റെ ഭാഗത്തു നിന്ന് അങ്ങനെ ഒരു പിഴവ് ഉണ്ടായി. പലര്ക്കും അറിഞ്ഞും അറിയാതെയും ട്രാഫിക്ക് നിയമങ്ങളില് പിഴവ് ഉണ്ടാവാറുണ്ട്. പ്രത്യേകിച്ച് ജനപ്രതിനിധികളുടെ ഭാഗത്തു നിന്ന് അങ്ങനെ ഉണ്ടാകുവാന് പാടില്ല. ഞാന് അതില് ഖേദം പ്രകടിപ്പിക്കുന്നു.
ഈ നിയമസഭാ തെരഞ്ഞെടുപ്പിന് മുന്പ് പുതുപ്പള്ളി പള്ളിയില് ഉമ്മന്ചാണ്ടി സാറിന്റെ കല്ലറയില് പോകുന്ന വഴിക്കാണ് പിഴവ് സംഭവിച്ചതെന്ന് ഞാന് ഓര്ക്കുകയാണ്. തെരഞ്ഞെടുപ്പില് മത്സരിച്ച സമയത്ത് ഇങ്ങനെയുള്ള കേസുകളുടെ എല്ലാം പിഴ അടച്ചു എന്നതാണ് എന്റെ ഓര്മ്മ. ഇല്ലാ എങ്കില് പിഴ അടക്കുവാനും തെറ്റ് ആവര്ത്തിക്കാതെ ഇരിക്കാനും ശ്രദ്ധിക്കുന്നതാണ്. ഈ സംഭവം വിഷ്വല് മീഡിയകളില് വാര്ത്ത വന്നതുകൊണ്ടാണ് ഈ കുറിപ്പ് എഴുതുന്നത്. ആയതിനാല് ഈ സംഭവത്തില് ഞാന് ക്ഷമ ചോദിക്കുകയും ചെയ്യുന്നു. തെറ്റ് ചൂണ്ടിക്കാണിച്ച മാധ്യമങ്ങളോട് നന്ദിയും രേഖപ്പെടുത്തുന്നു.
