കണ്ണൂർ: ഇരിക്കൂറില് വലിയ കോളിളക്കം സൃഷ്ടിച്ച കുഞ്ഞാമിന വധക്കേസിലെ രണ്ടാം പ്രതി പത്ത് വർഷത്തിന് ശേഷം പിടിയിലായി.
അബ്ബാസ് അലിയെയാണ് ക്രൈംബ്രാഞ്ച് അന്വേഷണ സംഘം ഡല്ഹിയില് നിന്ന് പിടികൂടിയത്. ഇതോടെ കേസിലെ മൂന്ന് പ്രതികളും പോലീസ് വലയിലായി. 2016 ഏപ്രില് 30-നാണ് നാടിനെ നടുക്കിയ കൊലപാതകം നടന്നത്. വസ്ത്രവ്യാപാരികളെന്ന വ്യാജേന കുഞ്ഞാമിനയുടെ ഉടമസ്ഥതയിലുള്ള വാടക ക്വാർട്ടേഴ്സില് താമസിച്ചിരുന്ന മൂന്നംഗ സംഘമാണ് കൃത്യം നടത്തിയത്.
ക്വാർട്ടേഴ്സിലേക്ക് വിളിച്ചുവരുത്തിയ കുഞ്ഞാമിനയെ കെട്ടിയിട്ട് അതിക്രൂരമായി കൊലപ്പെടുത്തിയ ശേഷം, ഇവരുടെ കൈവശമുണ്ടായിരുന്ന സ്വർണവും പണവും കവർന്ന് പ്രതികള് നാടുവിടുകയായിരുന്നു.ആദ്യഘട്ടത്തില് ലോക്കല് പോലീസ് അന്വേഷിച്ച കേസില് കാര്യമായ പുരോഗതി ഇല്ലാതിരുന്നതിനെ തുടർന്നാണ് അന്വേഷണം ക്രൈംബ്രാഞ്ചിന് കൈമാറിയത്. 2026 മാർച്ച് 24-ന് കേസില് നിർണായക വഴിത്തിരിവുണ്ടായി. മധ്യപ്രദേശില് വ്യാജ പേരുകളില് ഒളിവില് താമസിച്ചിരുന്ന കേസിലെ ഒന്നും മൂന്നും പ്രതികളായ പർവീണ് ബാബുവിനെയും മകള് സക്കീന ഫാത്തിമയെയും ക്രൈംബ്രാഞ്ച് പിടികൂടിയിരുന്നു. ഇവരെ ചോദ്യം ചെയ്തതില് നിന്ന് ലഭിച്ച നിർണായക വിവരങ്ങളുടെ അടിസ്ഥാനത്തിലാണ് അന്വേഷണ സംഘം ഡല്ഹിയിലെത്തി അബ്ബാസ് അലിയെ വലയിലാക്കിയത്.






