തൃശൂര്‍: കുന്നംകുളത്ത് ലഹരിക്കച്ചവടം ചോദ്യം ചെയ്തതിന് വയോധികനെ മകന്‍ വീട്ടില്‍ നിന്ന് ഇറക്കിവിട്ടു. എങ്ങോട്ട് പോകണമെന്ന് അറിയാതെ കുന്നംകുളം പാറേമ്പാടം സ്വദേശി സൈമണ്‍ കളക്ടറേറ്റിനു മുന്നില്‍ കുത്തിയിരുന്നു.
സൈമണെ പൊലീസ് വീട്ടിലേക്ക് കൂട്ടിക്കൊണ്ട് പോകുകയും ചെയ്തു.
തന്റെ മകന്റെ ലഹരികച്ചവടത്തെക്കുറിച്ച്‌ സൈമണ്‍ പൊലീസിന് വിവരം നല്‍കിയിരുന്നു. അതേ തുടര്‍ന്ന് തനിക്ക് ക്രൂരമായ മര്‍ദനം ഏല്‍ക്കേണ്ടി വന്നുവെന്നാണ് സൈമണ്‍ പറയുന്നത്.
സൈമന്റെ മകന്‍ ജോബിന്‍ പിതാവിനെ നോക്കുന്നില്ലെന്നും മര്‍ദിക്കുന്നുവെന്നും ചൂണ്ടിക്കാട്ടി ബന്ധു ഒരു പരാതി നല്‍കിയിരുന്നു. ഇതിന് പിന്നാലെ സൈമണെ വീട്ടില്‍ പ്രവേശിപ്പിക്കാനും മകന്‍ ജോബിനെ വീട്ടില്‍ നിന്ന് പുറത്താക്കാനും കുന്നംകുളം മുന്‍സിഫ് കോടതി ഉത്തരവിട്ടിരുന്നു.
എന്നാല്‍ ഉത്തരവ് ലഭിച്ച്‌ മണിക്കൂറുകള്‍ പിന്നിട്ടിട്ടും കുന്നംകുളം പോലീസ് കളക്ടറേറ്റിനു മുന്നില്‍ എത്തിയില്ലെന്നാണ് സൈമണ്‍ ആരോപിച്ചത്. പോലീസ് എത്താതെ താന്‍ എവിടേക്കും പോകില്ലെന്ന് ഉറപ്പിച്ച്‌ സൈമണ്‍ കളക്ടറേറ്റിനു മുന്നില്‍ കുത്തിയിരിക്കുകയായിരുന്നു.
