ഏറ്റുമാനൂർ: കഴിഞ്ഞ 10 വർഷം കോട്ടയം മെഡിക്കല്‍ കോളജില്‍ നടത്തിയ അനധികൃത നിയമനങ്ങള്‍ പുനഃപരിശോധിക്കണമെന്നും അനധികൃത നിയമനങ്ങളിലൂടെ കോടിക്കണക്കിന് രൂപ ആശുപത്രി വികസന സമിതിക്ക് നഷ്ടം വരുത്തിയ നടപടികളെക്കുറിച്ച്‌ അന്വേഷണം നടത്തണമെന്നും കേരള കോണ്‍ഗ്രസ് ഏറ്റുമാനൂർ നിയോജകമണ്ഡലം കമ്മിറ്റി ആവശ്യപ്പെട്ടു.
നിയോജകമണ്ഡലം പ്രസിഡന്റ് ബിനു ചെങ്ങളം അധ്യക്ഷത വഹിച്ച യോഗം പാർട്ടി സംസ്ഥാന സെക്രട്ടറി ജനറല്‍ ജോയ് ഏബ്രഹാം ഉദ്ഘാടനം ചെയ്തു.
ജില്ലാ പ്രസിഡന്റ് ജയ്സണ്‍ ജോസഫ് മുഖ്യപ്രഭാഷണം നടത്തി. പാർട്ടി ഉന്നതാധികാര സമിതി അംഗങ്ങളായ കെ.പി. പോള്‍, ജയിംസ് കുര്യൻ, മൈക്കിള്‍ ജയിംസ്, സംസ്ഥാന ജനറല്‍ സെക്രട്ടറിമാരായ സാബു പീടിയേക്കല്‍, സ്റ്റീഫൻ ചാഴികാടൻ, ടോമി നരിക്കുഴി, ഷൈജി ഓട്ടപ്പള്ളി, ജയ്സണ്‍ ഞൊങ്ങിണി, സിബി ചിറയില്‍, ടിറ്റോ പയ്യനാടൻ തുടങ്ങിയവർ പ്രസംഗിച്ചു.
