കൊല്ലം: നീണ്ടകര സ്വദേശിയായ യുവതിയെ ഭർത്താവ് ക്രൂരമായി മർദിച്ച സംഭവത്തില്‍ ദേശീയ വനിതാ കമ്മീഷൻ സ്വമേധയാ കേസെടുത്തു.
കൊല്ലം നീണ്ടകര സ്വദേശി അഞ്ജുവിനെ സ്ത്രീധനത്തിന്റെ പേരില്‍ ക്രൂരമായി മർദിച്ച സംഭവത്തിലാണ് വനിതാ കമ്മീഷൻ കേസെടുത്തത്. മാധ്യമവാർത്തകളുടെ അടിസ്ഥാനത്തിലാണ് നടപടി.
ഭർത്താവ് നന്ദുവും ഭർതൃവീട്ടുകാരും സ്ത്രീധനത്തിന്റെ പേരില്‍ പീഡിപ്പിച്ചെന്നും ഉപദ്രവിച്ചെന്നുമായിരുന്നു അഞ്ജുവിന്റെ പരാതി.
സൗദിയില്‍വെച്ചാണ് യുവതി ഭർത്താവിന്റെ ക്രൂരപീഡനത്തിനിരയായത്. സൗദിയിലെ വീട്ടില്‍വെച്ച്‌ ലാപ്ടോപ്പ് ചാർജർ, ബെല്‍റ്റ്, കുക്കർ തുടങ്ങിയവ കൊണ്ടെല്ലാം അഞ്ജുവിനെ ഭർത്താവ് മർദിച്ചു.
മർദനമേറ്റ് യുവതിയുടെ ശരീരമാസകലം പരിക്കേറ്റിട്ടുണ്ട്. ഇതിനുപുറമേ കഴുത്തില്‍ കത്തിവെച്ച്‌ ഭീഷണിപ്പെടുത്തിയതായും ഭീഷണിപ്പെടുത്തി റെക്കോ‍ർഡ് ചെയ്ത ശബ്ദരേഖ ഭർത്താവ് പ്രചരിപ്പിച്ചതായും യുവതി പറഞ്ഞിരുന്നു.
