കാഞ്ഞിരപ്പള്ളി: റവന്യു ജില്ലാ സ്കൂൾ കായികമേളയിൽ ഇരട്ടക്കിരീടം ചൂടി കാഞ്ഞിരപ്പള്ളി.
കാഞ്ഞിരപ്പള്ളി വിദ്യാഭ്യാസ ജില്ലയും സ്കൂൾ വിഭാഗത്തിൽ കോരുത്തോട് സികെഎം എച്ച്എസ്എസുമാണ് ചാമ്പ്യൻപട്ടം സ്വന്തമാക്കിയത്.
കായികതാരങ്ങളുടെ മികവും പരിശീലകരുടെ കഠിനാധ്വാനവും ഒരുപോലെ തുണയായപ്പോൾ കാഞ്ഞിരപ്പള്ളിക്ക് ഇത് അഭിമാനവിജയമായി.
കാഞ്ഞിരപ്പള്ളി വിദ്യാഭ്യാസ ജില്ല 309 പോയിന്‍റ് നേടിയാണ് ഒന്നാം സ്ഥാനത്തെത്തിയത്.
സ്കൂൾ വിഭാഗത്തിൽ 161 പോയിന്‍റ് സ്വന്തമാക്കിയ കോരുത്തോട് സികെഎം എച്ച്എസ്എസ് എതിരാളികളെ ബഹുദൂരം പിന്തള്ളിയാണ് കിരീടം ഉറപ്പിച്ചത്.
പാലാ വിദ്യാഭ്യാസ ജില്ല 223 പോയിന്‍റുമായി രണ്ടാം സ്ഥാനവും 62 പോയിന്‍റുമായി കോട്ടയം ഈസ്റ്റ് മൂന്നാം സ്ഥാനവും കരസ്ഥമാക്കി.
സ്കൂൾ വിഭാഗത്തിൽ പാലാ സെന്‍റ് തോമസ് എച്ച്എസ്എസ് 79 പോയിന്‍റ് നേടി രണ്ടാം സ്ഥാനവും മുരിക്കുംവയൽ ഗവൺമെന്‍റ് വിഎച്ച്എസ് 46 പോയിന്‍റുമായി മൂന്നാം സ്ഥാനവും കരസ്ഥമാക്കി.
.റവന്യൂ ജില്ലാ സ്കൂൾ കായികമേള സമാപന സമ്മേളനം പ്രഫ. റോണി കെ. ബേബി ഉദ്ഘാടനം ചെയ്തു.
പാറത്തോട് പഞ്ചായത്ത് വൈസ് പ്രസിഡന്‍റ് ഡയസ് കോക്കാട്ട് അധ്യക്ഷത വഹിച്ചു.
ഡിഡിഇ ഹണി ജി. അലക്സാണ്ടർ, വാർഡ് മെംബർ വി.എം. ഷാജഹാൻ, കൈറ്റ് ജില്ലാ കോ ഓർഡിനേറ്റർ തോമസ് വർഗീസ്,
കാഞ്ഞിരപ്പള്ളി എഇഒ എസ്. സുൽഫിക്കർ, കോട്ടയം ആർഡിഎസ്ജിഎ സെക്രട്ടറി ജോഷി ഇമ്മാനുവേൽ എന്നിവർ പ്രസംഗിച്ചു.
