ഡല്‍ഹി: തലസ്ഥാനത്തെ പ്രതിഷേധസമരങ്ങളുടെ റിപ്പോർട്ടിങ്ങിനെത്തുന്ന മാധ്യമപ്രവർത്തകർക്ക് മാർഗനിർദേശങ്ങളുമായി ഡല്‍ഹി പൊലീസ്.
കഴിഞ്ഞദിവസങ്ങളില്‍ പൊലീസുകാർ വനിതാ മാധ്യമപ്രവർത്തകരെ അടക്കം ഉപദ്രവിച്ചെന്ന പരാതി ഉയർന്നതിന് പിന്നാലെയാണ് പ്രതിഷേധവേദിയിലെ റിപ്പോർട്ടിങ്ങിന് ഡല്‍ഹി പൊലീസ് മാർഗനിർദേശങ്ങള്‍ പുറപ്പെടുവിച്ചത്.
പ്രതിഷേധങ്ങള്‍ റിപ്പോർട്ട് ചെയ്യാനെത്തുന്ന മാധ്യമപ്രവർത്തകർ ഐഡി കാർഡ് എല്ലായ്പ്പോഴും കരുതണമെന്നും ഇത് ശരിയായി കാണുന്നരീതിയില്‍ ധരിക്കണമെന്നതുമാണ് പ്രധാന നിർദേശം.
പൊലീസ് നടപടികളെ തടസ്സപ്പെടുത്തുന്ന രീതിയില്‍ ഇടപെടരുത്.
സംഘർഷസാഹചര്യങ്ങളില്‍ സുരക്ഷിത അകലം പാലിക്കണം തുടങ്ങിയ നിർദേശങ്ങളുമുണ്ട്.
മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധങ്ങള്‍ക്കിടെയാണ് വനിതാ മാധ്യമപ്രവർത്തകരെ പൊലീസുകാർ ഉപദ്രവിച്ചെന്ന ആരോപണവും ഉയർന്നത്. വനിതാ മാധ്യമപ്രവർത്തകരെ കൈയേറ്റം ചെയ്തെന്നും ലൈംഗികമായി ഉപദ്രവിച്ചെന്നുമായിരുന്നു പരാതി.
ഇതിനിടെ, ആരോപണം നേരിടുന്ന എസിപി വിവേക് ഭഗത്തിന്റെ പ്രൊമോഷൻ ഉത്തരവ് മരവിപ്പിക്കുകയും ചെയ്തിരുന്നു.
