ഡൽഹി: ഗാന്ധിജയന്തി ദിനത്തില്‍ രാജ്യ തലസ്ഥാനത്തെ പ്രകമ്പനം കൊള്ളിച്ച്‌ യുവജന സംഘടനകളുടെ സമരം.
മുഖ്യ തെരഞ്ഞെടുപ്പ് കമ്മീഷണർ സ്ഥാനത്ത് നിന്നുള്ള ഗ്യാനേഷ് കുമാറിൻ്റെ രാജി ആവശ്യപ്പെട്ട് എത്തിയവരെ ജന്തർ മന്തറിലേക്ക് പ്രവേശിപ്പിക്കാതെ പൊലീസ് തടഞ്ഞു.
എംപിമാർ അടക്കം നേതാക്കളെ അറസ്റ്റ് ചെയ്ത് നീക്കി. ഡൽഹി പൊലീസ് വനിതാ പ്രവർത്തകരെ ഉപദ്രവിച്ചെന്നും പരാതിയുണ്ട്.
മുഖ്യ തെരഞ്ഞെടുപ്പ് കമ്മീഷറുടെ രാജി ആവശ്യപ്പെട്ടുള്ള രാജ്യവ്യാപക പ്രതിഷേധം ശക്തിപ്പെടുകയാണ്. ഡൽഹി പൊലീസ് അനുമതി നിഷേധിച്ചെങ്കിലും ജന്തർ മന്തറിലേക്ക് മാർച്ച്‌ നടത്തുമെന്ന് വിവിധ യുവജന സംഘടനകള്‍ നേരത്തെ പ്രഖ്യാപിച്ചിരുന്നു.
11 മെട്രോസ്റ്റേഷനുകളും പ്രധാനപ്പെട്ട റോഡുകളും അടച്ചിട്ടും കേന്ദ്രസേനയെ അടക്കം വിന്യസിച്ചും രാവിലെ മുതല്‍ കനത്ത ജാഗ്രതയിലായിരുന്നു ഡൽഹി. എഎപി യൂത്ത് വിങ്ങാണ് ആദ്യം സമരവുമായി എത്തിയത്. ഇവരെ അറസ്റ്റ് ചെയ്ത് നീക്കിയപ്പോള്‍ കാനിംഗ് ലൈനില്‍നിന്നും ഡിവൈഎഫ്‌ഐയും എസ്‌എഫ്‌ഐയും മാർച്ച്‌ തുടങ്ങി.
കേരളത്തില്‍ നിന്നടക്കമുള്ള നൂറുകണക്കിന് പ്രവർത്തകർ മാർച്ചില്‍ പങ്കെടുത്തു. ജന്തർ മന്തറിലേക്കുള്ള റോഡില്‍ പൊലീസ് തടഞ്ഞപ്പോള്‍ സംഘർഷമായി. സമരം നയിച്ച സിപിഎം ജന സെക്രട്ടറി എംഎ ബേബിയെയും എംപിമാരടക്കം നേതാക്കളേയും പൊലീസ് ബലം പ്രയോഗിച്ചാണ് നീക്കിയത്.
പലരെയും റോഡില്‍ വലിച്ചിഴച്ചു. തുടർന്ന് എഐവൈഎഫ്, എംഎസ്‌എഫ്, ഐസ, എന്നീ സംഘടനകളും വിവിധ പൗരാവകാശ കൂട്ടായ്മകളും മാർച്ചായി എത്തി. മണിക്കൂറുകളോളം ജന്തർമന്തറിന് അടുത്തുള്ള പ്രദേശം സംഘർഷ ഭരിതമായി.
