ചെന്നൈ: ദീപാവലി ആഘോഷങ്ങള്‍ക്കിടെ പടക്കം പൊട്ടിക്കുന്നതിനിടെയുണ്ടായ അപകടങ്ങളില്‍ തമിഴ്‌നാട്ടില്‍ ഒരു കുട്ടി മരിച്ചു.
സംസ്ഥാനത്തുടനീളം 269 പേർക്ക് പൊള്ളലേറ്റ് ചികിത്സ തേടേണ്ടി വന്നതായി ഔദ്യോഗിക കണക്കുകള്‍ വ്യക്തമാക്കുന്നു. നവംബർ 7 രാവിലെ 7 മണി മുതല്‍ നവംബർ 8 രാവിലെ 7 മണിവരെയുള്ള 24 മണിക്കൂറിലെ കണക്കുകളാണ് പുറത്തുവന്നിട്ടുള്ളത്.
ആഘോഷങ്ങളുമായി ബന്ധപ്പെട്ട് സംസ്ഥാനത്തെ '108' അടിയന്തര ആംബുലൻസ് ശൃംഖലയിലേക്ക് വൻ കോളുകളുടെ പ്രവാഹമായിരുന്നു. 24 മണിക്കൂറിനുള്ളില്‍ 16,079 അടിയന്തര കോളുകളാണ് ലഭിച്ചത്.
പടക്കം പൊട്ടിച്ചുള്ള പൊള്ളലേറ്റ അപകടങ്ങളെക്കുറിച്ച്‌ മാത്രം നൂറോളം കോളുകള്‍ അടിയന്തര സേവനത്തിന് ലഭിച്ചതായി അധികൃതർ വ്യക്തമാക്കി.
അപകടങ്ങളെ തുടർന്ന് തഞ്ചാവൂർ ഗവണ്‍മെന്റ് മെഡിക്കല്‍ കോളേജ് ഉള്‍പ്പെടെയുള്ള പ്രധാന ആശുപത്രികളില്‍ വലിയ തിരക്കാണ് അനുഭവപ്പെട്ടത്.
പെരിയാർ നഗർ ഗവണ്‍മെന്റ് ആശുപത്രിയില്‍ 64 പേരെ കിടത്തിച്ചികിത്സയ്ക്ക് പ്രവേശിപ്പിച്ചു. തൂത്തുക്കുടി ഗവണ്‍മെന്റ് മെഡിക്കല്‍ കോളേജ് ആശുപത്രിയില്‍ 13 പേരെ കിടത്തിച്ചികിത്സക്ക് പ്രവേശിപ്പിച്ചു.
നിസാര പരിക്കേറ്റ 46 പേരെ പ്രാഥമിക ശുശ്രൂഷ നല്‍കി വിട്ടയച്ചു. ആഘോഷ വേളയിലെ അടിയന്തര സാഹചര്യങ്ങള്‍ നേരിടാൻ സംസ്ഥാനത്തുടനീളം 1,283 ആംബുലൻസുകളാണ് സജ്ജമാക്കിയിരുന്നത്.
