കടനാട്: കടനാട് തോട്ടിലും ചെക്ക് ഡാമുകളിലും വെള്ളം നുരയും പതയുമായി ഒഴുകിയ സംഭവത്തെ തുടർന്ന് നടത്തിയ പരിശോധനയില്‍ അപകടകരമായ രാസവസ്തുക്കളുടെ സാന്നിധ്യം കണ്ടെത്തിയില്ലെന്ന് സൂചന.
വെള്ളത്തില്‍ വിവിധതരം രാസവസ്തുക്കള്‍ കണ്ടെത്തിയിട്ടുണ്ടെങ്കിലും അവ അപകടകരമായ അളവിലല്ലെന്നാണ് റിപ്പോർട്ട് വ്യക്തമാക്കുന്നത്. വിശദമായ പരിശോധനാ റിപ്പോർട്ട് നാളെ ലഭിക്കും.
സംഭവത്തെത്തുടർന്ന് താത്ക്കാലികമായി നിർത്തിവച്ചിരുന്ന കുടിവെള്ള വിതരണം പുനരാരംഭിച്ചു. സൂപ്പർ ക്ലോറിനേഷൻ ഉള്‍പ്പെടെയുള്ള ശുദ്ധീകരണ നടപടികള്‍ പൂർത്തിയാക്കിയ ശേഷമാണ് വിതരണം പുനരാരംഭിച്ചതെന്ന് ആരോഗ്യവിഭാഗം അധികൃതർ അറിയിച്ചു. അതേസമയം, പൊതുജനങ്ങള്‍ ജാഗ്രത തുടരണമെന്നും വെള്ളം തിളപ്പിച്ച ശേഷം മാത്രമേ കുടിക്കാവൂ എന്നും ആശുപത്രി ആരോഗ്യവിഭാഗം നിർദേശിച്ചിട്ടുണ്ട്.
തോട്ടില്‍ നുരയും പതയും രൂപപ്പെടാനിടയായ സാഹചര്യം കണ്ടെത്തുന്നതിനുള്ള അന്വേഷണം തുടരുകയാണ്. ഇതുസംബന്ധിച്ച്‌ പരിശോധന നടത്താൻ മലിനീകരണ നിയന്ത്രണ ബോർഡിന് ആരോഗ്യവിഭാഗം കത്ത് നല്‍കിയിട്ടുണ്ട്. പുഴയിലൂടെ ഒഴുകിയെത്തുന്ന വെള്ളത്തില്‍ മാലിന്യത്തിന്റെ ഉറവിടം കണ്ടെത്തുക എളുപ്പമല്ലെന്നാണ് അധികൃതരുടെ വിലയിരുത്തല്‍. തോട്ടില്‍ ഇപ്പോള്‍ നുരയും പതയും രൂപപ്പെടുന്ന സാഹചര്യമില്ലെന്നും അധികൃതർ വ്യക്തമാക്കി.
