തിരുവനന്തപുരം: ഇന്റർനെറ്റില്‍ തിരയുന്ന കസ്റ്റമർ കെയർ നമ്പറുകള്‍ വഴി പണവും വ്യക്തിഗത വിവരങ്ങളും ചോരുന്ന തട്ടിപ്പുകള്‍ വർദ്ധിക്കുന്നതിനാല്‍ ജാഗ്രത പാലിക്കണമെന്ന് ആഭ്യന്തര വകുപ്പ്.
ബാങ്കുകള്‍, ഇ-കോമേഴ്‌സ് പ്ലാറ്റ്‌ഫോമുകള്‍ തുടങ്ങിയ വിവിധ സ്ഥാപനങ്ങളുടെ പേരില്‍ തട്ടിപ്പുകാർ ഇന്റർനെറ്റില്‍ വ്യാജ നമ്പറുകള്‍ പോസ്റ്റ് ചെയ്താണ് ഉപഭോക്താക്കളെ വലയിലാക്കുന്നത്.
സഹായത്തിനായി ഉപഭോക്താക്കള്‍ ഈ നമ്പറുകളിലേക്ക് വിളിക്കുമ്പോള്‍ നേരിട്ട് കണക്റ്റാകില്ല. തുടർന്ന് കസ്റ്റമർ സപ്പോർട്ട് ഏജന്റാണെന്ന വ്യാജേന തട്ടിപ്പുകാർ തിരികെ വിളിക്കുകയാണ് ചെയ്യുന്നത്. പരാതി പരിഹരിക്കാനെന്ന പേരില്‍ ഫോണില്‍ റിമോട്ട് ആക്‌സസ് അല്ലെങ്കില്‍ സ്‌ക്രീൻ ഷെയറിംഗ് ആപ്പുകള്‍ ഇൻസ്റ്റാള്‍ ചെയ്യാൻ ആവശ്യപ്പെടും. തുടർന്ന് രജിസ്ട്രേഷൻ ഫീസെന്നോ വെരിഫിക്കേഷൻ ഫീസെന്നോ പറഞ്ഞ് അഞ്ചു രൂപ പോലെയുള്ള ചെറിയ തുക അടയ്ക്കാൻ നിർദ്ദേശിക്കും. ഇതിലൂടെ ബാങ്കിംഗ് വിവരങ്ങളും വ്യക്തിഗത വിവരങ്ങളും ചോർത്തി വൻ സാമ്പത്തിക തട്ടിപ്പാണ് ഇവർ നടത്തുന്നതെന്ന് ആഭ്യന്തര വകുപ്പ് മുന്നറിയിപ്പ് നല്‍കി.
ഗൂഗിളില്‍ തിരയുമ്പോള്‍ ലഭിക്കുന്ന കസ്റ്റമർ കെയർ നമ്പറുകള്‍ പൂർണമായി വിശ്വസിക്കരുത്. ഏതൊരു സേവനത്തിനും സ്ഥാപനങ്ങളുടെ ഔദ്യോഗിക വെബ്‌സൈറ്റോ ആപ്പോ മാത്രം ഉപയോഗിക്കുക. അജ്ഞാതരുടെ ആവശ്യപ്രകാരം യാതൊരു കാരണവശാലും റിമോട്ട് ആക്‌സസ് ആപ്പുകള്‍ ഫോണില്‍ ഇൻസ്റ്റാള്‍ ചെയ്യുകയോ രജിസ്ട്രേഷൻ ഫീസുകള്‍ നല്‍കുകയോ ചെയ്യരുത്.
ഒ.ടി.പി, പിൻ, പാസ്‌വേഡ്, കാർഡ് വിവരങ്ങള്‍ തുടങ്ങിയവ ആരുമായും പങ്കുവയ്ക്കരുത്. ഫോണ്‍ സംഭാഷണത്തിനിടെ എന്തെങ്കിലും സംശയം തോന്നിയാല്‍ ഉടൻ കോള്‍ അവസാനിപ്പിച്ച്‌ ഔദ്യോഗിക വിവരങ്ങള്‍ വഴി ബന്ധപ്പെടുകയോ തൊട്ടടുത്ത ബ്രാഞ്ച് നേരിട്ട് സന്ദർശിക്കുകയോ ചെയ്യണമെന്നും പൊലീസ് നിർദേശം നല്‍കി. ഏതെങ്കിലും തരത്തിലുള്ള സൈബർ സാമ്പത്തിക തട്ടിപ്പിനിരയായാല്‍ ഉടൻതന്നെ 1930 എന്ന സൈബർ ഹെല്‍പ് ലൈൻ നമ്പറിലോ www.cybercrime.gov.in എന്ന ദേശീയ സൈബർ ക്രൈം പോർട്ടല്‍ വഴിയോ പരാതി നല്‍കേണ്ടതാണ്.
