ആലപ്പുഴ: എഐസിസി സംഘടനാ ജനറല്‍ സെക്രട്ടറി കെ സി വേണുഗോപാലിന് എതിരായ സൈബർ ആക്രമണക്കേസില്‍ പരാതിയുമായി മുന്നോട്ടുപോകാൻ കോണ്‍ഗ്രസ് നേതാവ് ജോണ്‍സണ്‍ എബ്രഹാം.
കോണ്‍ഗ്രസ് പ്രവർത്തകരെ കേസില്‍ പെടുത്താൻ ആഗ്രഹിക്കുന്നില്ലെന്ന് കെ സി വേണുഗോപാല്‍ പറഞ്ഞിരുന്നു. എന്നാല്‍ പരാതി പിൻവലിക്കില്ലെന്ന നിലപാടിലാണ് ജോണ്‍സണ്‍ എബ്രഹാം.
ഇതോടെ ആശയക്കുഴപ്പത്തിലായിരിക്കുകയാണ് പൊലീസ്. പരാതിയില്‍ കേസെടുത്തതിനപ്പുറം സൈബർ പൊലീസ് മറ്റു നടപടികളിലേക്ക് കടന്നിട്ടില്ല.
തെരഞ്ഞെടുപ്പ് വിജയത്തിന് ശേഷമുണ്ടായ മുഖ്യമന്ത്രി തർക്ക സമയത്താണ് കെ സി വേണുഗോപാലിനെതിരെ രൂക്ഷമായ സൈബർ ആക്രമണം ഉണ്ടായത്. സൈബർ ആക്രമണത്തെ പറ്റി അന്വേഷണം വേണമെന്ന കെപിസിസി രാഷ്ട്രീയ കാര്യ സമിതി അംഗം ജോണ്‍സണ്‍ എബ്രഹാമിൻ്റെ പരാതിയില്‍ രണ്ടു മാസത്തിന് ശേഷമാണ് പൊലീസ് കേസെടുത്തത്.
ഡിജിപിക്ക് നല്‍കിയ പരാതിയില്‍ നടപടിയും ഉണ്ടാകാതെ വന്നതോടെ ജോണ്‍സണ്‍ എബ്രഹാം ആഭ്യന്തര മന്ത്രിയെ സമീപിച്ചതിന് പിന്നാലെ ആണ് സൈബർ പൊലീസിൻ്റെ നടപടിയുണ്ടായത്.
