തിരുവനന്തപുരം: ഡല്ഹിയില് കേന്ദ്ര സർക്കാരിനെതിരേയുള്ള പ്രതിഷേധ മാർച്ചിനായി ട്രെയിൻ വാടകയ്ക്കെടുക്കാൻ സിപിഐ.
18 കോച്ചുള്ള ട്രെയിൻ മൊത്തമായി വാടകയ്ക്കെടുത്ത് ഡല്ഹിക്ക് പോവാനാണ് സംസ്ഥാന നേതൃയോഗത്തില് തീരുമാനിച്ചത്.
അഡ്വാൻസ് തുകയായി 9 ലക്ഷം രൂപ പാർട്ടി റെയില്വേയ്ക്ക് നല്കി. കേരളത്തില് ഇത് ആദ്യമായാണ് ഒരു രാഷ്ട്രീയ പാർട്ടി പ്രത്യേക ട്രെയിൻ ബുക്ക് ചെയ്ത് യാത്ര ചെയ്യുന്നത്.
സെപ്റ്റംബർ ഒന്നിനാണ് സിപിഐയുടെ ദേശീയ തല പ്രതിഷേധ പരിപാടി ഡല്ഹിയില് നടക്കുന്നത്. കേരളത്തില് നിന്ന് 1500 പേരാണ് ഇതില് പങ്കെടുക്കുക. ഇത്രയും പേർക്ക് ഒന്നിച്ച് പോവാനായാണ് ട്രെയിൻ വാടകയ്ക്കെടുത്തത്.
ഓഗസ്റ്റ് 28 ന് കൊച്ചുവേളിയില് നിന്ന പുറപ്പെടുന്ന ഈ പ്രത്യേക ട്രെയിൻ 31 ന് ഡല്ഹിയിലെത്തും. തിരിച്ച് സെപ്റ്റംബർ 2 ന് പുറപ്പെട്ട് നാലിന് തിരുവനന്തപുരത്തെത്തും.
