മൊബൈലിൽ ഉച്ചത്തിൽ പാട്ടുവെച്ചാൽ ട്രെയിനിൽ നിന്ന് ഇറക്കിവിടും, ആയിരം രൂപ പിഴയും;

തീവണ്ടി യാത്രക്കാർക്ക് കൂടുതൽ സുഖകരവും സമാധാനപരവുമായ യാത്ര ഉറപ്പാക്കുന്നതിനായി മൊബൈൽ ഫോണുകളിൽ ഉച്ചത്തിൽ പാട്ടുവെക്കുകയോ വീഡിയോകൾ കാണുകയോ ചെയ്യുന്നവർക്കെതിരെ കടുത്ത നടപടികളുമായി ഇന്ത്യൻ റെയിൽവേ രംഗത്തെത്തി. സഹയാത്രികർക്ക് ശല്യമാകുന്ന രീതിയിൽ മൊബൈൽ ഫോൺ ലൗഡ് സ്പീക്കറിലിട്ട് ഉപയോഗിക്കുന്ന യാത്രക്കാരെ പാതിവഴിയിൽ ട്രെയിനിൽ നിന്ന് ഇറക്കിവിടാനും ആയിരം രൂപ പിഴ ചുമത്താനും ടിക്കറ്റ് റദ്ദാക്കാനും റെയിൽവേ നിയമത്തിൽ ഭേദഗതി വരുത്തിയിട്ടുണ്ട്. ഉച്ചത്തിലുള്ള ഫോൺ സംഭാഷണങ്ങൾക്കെതിരെയും വ്യാപകമായ പരാതികൾ ഉയർന്ന പശ്ചാത്തലത്തിലാണ് ഈ പുതിയ നിയമ പരിഷ്കാരം ഉടനടി പ്രാബല്യത്തിൽ കൊണ്ടുവന്നത്. യാത്രയ്ക്കിടയിൽ ട്രെയിനിലെ ജീവനക്കാരുടെയോ ടിക്കറ്റ് എക്സാമിനറുടെയോ നിർദ്ദേശങ്ങൾ അവഗണിക്കുന്നവർക്ക് ആറുമാസം വരെ തടവുശിക്ഷയും അയ്യായിരം രൂപ വരെ പിഴയും ചുമത്താൻ നിയമത്തിൽ വ്യവസ്ഥയുണ്ട്. എന്നാൽ ഹെഡ്‌ഫോണുകളോ ഇയർഫോണുകളോ ഉപയോഗിച്ച് പാട്ട് കേൾക്കുന്നതിനോ വീഡിയോ കാണുന്നതിനോ യാതൊരുവിധ തടസ്സവുമുണ്ടായിരിക്കില്ല. പഴയ റെയിൽവേ ആക്ടിലെ ചില വകുപ്പുകൾ അനുസരിച്ച് യാത്രക്കാർക്ക് ശല്യമുണ്ടാക്കുന്നവർക്കെതിരെ മുൻപും നടപടിയെടുക്കാൻ കഴിയുമായിരുന്നെങ്കിലും ശിക്ഷാ വിവരങ്ങൾ കൃത്യമായി നിഷ്കർഷിച്ചിരുന്നില്ല. പുതിയ ജനവിശ്വാസ് ഭേദഗതി ആക്ട് പ്രകാരമാണ് ഈ പുതിയ വ്യവസ്ഥകൾ ഉൾപ്പെടുത്തി നിയമം കൂടുതൽ ശക്തമാക്കിയത്. യാത്രക്കാർക്ക് ട്രെയിനിലെ ടോൾ ഫ്രീ നമ്പറിലോ ഉദ്യോഗസ്ഥർക്കോ റെയിൽവേ ആപ്പ് വഴിയോ ഇതുസംബന്ധിച്ച പരാതികൾ നേരിട്ട് ബോധിപ്പിക്കാവുന്നതാണ്. അതേസമയം തിരുവനന്തപുരത്തുനിന്ന് ഷൊർണൂർ വരെയുള്ള ജനപ്രിയ സർവീസായ വേണാട് എക്സ്പ്രസിൽ കൂടുതൽ യാത്രക്കാരെ ഉൾക്കൊള്ളാൻ ശേഷിയുള്ള പുതിയ ജനറൽ സിറ്റിങ് കോച്ചുകൾ റെയിൽവേ ഘടിപ്പിച്ചുതുടങ്ങി. ആദ്യഘട്ടമായി പത്ത് പുതിയ കോച്ചുകളാണ് ട്രെയിനിൽ മാറ്റിയതെന്നും ബാക്കിയുള്ള കോച്ചുകൾ വരും ദിവസങ്ങളിൽ ഘട്ടംഘട്ടമായി മാറ്റുമെന്നും അധികൃതർ അറിയിച്ചു. ആകെ പത്തൊൻപത് ജനറൽ കോച്ചുകളാണ് വേണാട് എക്സ്പ്രസിന് ഉള്ളത്. നേരത്തെ ട്രെയിനിലെ ഒരു പഴയ കോച്ചിൽ നൂറ്റിയെട്ട് പേർക്ക് ഇരുന്നും നാൽപ്പത്തിരണ്ട് പേർക്ക് നിന്നും മാത്രം യാത്ര ചെയ്യാൻ കഴിഞ്ഞിരുന്ന സ്ഥാനത്ത് പുതിയ കോച്ചുകളിൽ ഇരുന്നൂറ്റി ഇരുപത് പേർക്ക് ഇരുന്നും അൻപത് മുതൽ എഴുപത് വരെ പേർക്ക് നിന്നും ഒരേസമയം യാത്ര ചെയ്യാൻ സാധിക്കും. ദനശതാബ്ദി ട്രെയിനുകളിൽ പുഷ്ബാക്ക് സീറ്റുകളുള്ള പുതിയ കോച്ചുകൾ അടുത്ത ആഴ്ചയോടെ ഉൾപ്പെടുത്തുമെന്നും ഇതിനായി പതിനാറ് പുതിയ കോച്ചുകൾ കൊച്ചുവേളിയിൽ എത്തിച്ചിട്ടുണ്ടെന്നും റെയിൽവേ വ്യക്തമാക്കുന്നു.