ഡൽഹി: നവംബർ ഒന്നിലെ റാലിയില്‍ മാറ്റമില്ലെന്ന നിലപാടില്‍ ഉറച്ച്‌ കോണ്‍ഗ്രസ്.
30 മുതല്‍ ഡൽഹിയിലുണ്ടാകണമെന്നാവശ്യപ്പെട്ട് സഖ്യകക്ഷി നേതാക്കള്‍ക്കും കോണ്‍ഗ്രസ് നേതാക്കള്‍ക്കും പ്രവർത്തകർക്കും എഐസിസി പ്രസിഡന്റ് മല്ലികാർജുൻ ഖർഗെ കത്ത് നല്‍കി.
റാലി മാറ്റണമെന്ന ചേംബർ ഓഫ് ട്രേഡ് ആൻ്റ് ഇൻഡസ്ട്രീസിൻ്റെ കത്ത് തള്ളിയാണ് കോണ്‍ഗ്രസിന്റെ തീരുമാനം. റാലിയില്‍ 10 ലക്ഷം പേരെ പങ്കെടുപ്പിക്കാനും കോണ്‍ഗ്രസ് ആലോചിക്കുന്നു.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ 30-ലെ പ്രതീകാത്മക വിചാരണയില്‍ മുൻ ജഡ്ജിമാരെയടക്കം പങ്കെടുപ്പിക്കും. ശൈത്യകാല സമ്മേളനത്തിലും ഇംപീച്ച്‌മെൻ്റ് നോട്ടീസ് നല്‍കും.
പ്രതിപക്ഷത്തിന്റെ മഹാറാലി പ്രഖ്യാപനം സിഖ് വിഭാഗക്കാർക്ക് എതിരെന്ന വിമർശനം ബിജെപി ശക്തമാക്കുമ്പോഴും പിന്നോട്ടില്ലെന്ന നിലപാടില്‍ ഉറച്ച്‌ നില്‍ക്കുകയാണ് പ്രതിപക്ഷം.
സിഖ് കലാപത്തിന്റെ വാർഷിക ദിനത്തില്‍ മഹാറാലി പ്രഖ്യാപിച്ച കോണ്‍ഗ്രസ് മുറിവില്‍ ഉപ്പ് തേക്കുകയാണെന്ന വിമർശനമാണ് ബിജെപി ഉയർത്തിയത്. പ്രതിപക്ഷം ഒരിടവേളയ്ക്ക് ശേഷം വീണ്ടും സമരം തുടങ്ങാനിരിക്കേയാണ് സിഖ് വികാരം ഉണർത്തി വിമർശനം കടുപ്പിക്കാനുള്ള ബിജെപി ശ്രമം.
