തിരുവനന്തപുരം: മുഖ്യമന്ത്രി വി ഡി സതീശനെ വഴി തടഞ്ഞ സംഭവത്തില് ഡിസിസി അംഗം ചേന്തി അനിലിനെ അറസ്റ്റ് ചെയ്തതിനെതിരെ ഡിസിസി അംഗം സുഹൈല് ഷാജഹാൻ രംഗത്ത്. ഏത് ഗ്രൂപ്പ് പോരിന്റെ ഭാഗമായാലും ചേന്തി അനിലിനെ പോലൊരാളെ അറസ്റ്റ് ചെയ്തത് പ്രതിഷേധാർഹമാണെന്ന് സുഹൈല് ഷാജഹാൻ പറഞ്ഞു. ഇതൊരു ജനാധിപത്യ പാർട്ടി അല്ലേ എന്നും കോണ്ഗ്രസ് അധികാരത്തില് ഇരിക്കുമ്പോള് കോണ്ഗ്രസ് പ്രവർത്തകരെ അറസ്റ്റ് ചെയ്യുന്നത് പ്രതിഷേധാർഹമാണെന്നും സുഹൈല് ഷാജഹാൻ പറഞ്ഞു.
മുഖ്യമന്ത്രിയുടെ രീതി ശരിയല്ലെന്നും അറസ്റ്റ് മോശമായ രീതിയാണെന്നും സുഹൈല് ഷാജഹാൻ പറഞ്ഞു. കേസെടുക്കേണ്ട എന്നാണ് മുഖ്യമന്ത്രിയുടെ ഓഫീസ് ആദ്യം പറഞ്ഞത്. പിന്നെ ആരുടെ നിർദേശപ്രകാരമാണ് കേസും അറസ്റ്റും എന്നും സുഹൈല് ഷാജഹാൻ ചോദിച്ചു.
തിരുവനന്തപുരം ചേന്തിയിലെ ശ്രീനാരായണ സാംസ്കാരിക നിലയത്തിലെ ചതയദിന പരിപാടികളില് പങ്കെടുക്കാത്തതില് പ്രതിഷേധിച്ചാണ് ഡിസിസി അംഗം ചേന്തി അനിലിൻ്റെ നേതൃത്വത്തിലുള്ള കോണ്ഗ്രസ് പ്രവർത്തകർ മുഖ്യമന്ത്രി വി ഡി സതീശൻ്റെ വാഹനവ്യൂഹം തടഞ്ഞത്. വാഹനം നിർത്തി പുറത്തിറങ്ങിയ മുഖ്യമന്ത്രി കടുത്ത രോഷത്തോടെ പ്രതികരിച്ചതോടെ അസാധാരണ രംഗങ്ങള് ഉണ്ടായി.
മര്യാദയ്ക്ക് സംസാരിക്കണമെന്ന് മുഖ്യമന്ത്രി പറഞ്ഞതോടെ മര്യാദയ്ക്ക് സംസാരിച്ചില്ലെങ്കില് താൻ എന്ത് ചെയ്യുമെന്ന് ചേന്തി അനില് തിരിച്ചുപറഞ്ഞു. ഇതോടെ സുരക്ഷാ ഉദ്യോഗസ്ഥർ ചേന്തി അനിലിനെ പിടിച്ചുമാറ്റി. പിന്നീടാണ് ചേന്തി അനിലിനെ പൊലീസ് അറസ്റ്റ് ചെയ്തത്. ഔദ്യോഗിക ജോലി തടസ്സപ്പെടുത്തി, അപമര്യാദയായി പെരുമാറി തുടങ്ങിയ വകുപ്പുകള് ചുമത്തി എഫ്ഐആർ രജിസ്റ്റർ ചെയ്യുകയായിരുന്നു.
