ഡൽഹി: റാലിയില്‍ പങ്കെടുക്കണമെന്ന് ദേശീയ നേതൃത്വം കർശന നിർദേശം നല്‍കിയിട്ടും വിട്ടുനിന്ന നേതാക്കള്‍ക്കെതിരെ കൂട്ടനടപടിയുമായി യൂത്ത് കോണ്‍ഗ്രസ്.
നവംബർ ഒന്നിന് ഡല്‍ഹിയിലെ രാംലീല മൈതാനിയില്‍ നടന്ന ഇന്ത്യ സഖ്യത്തിന്റെ റാലിയില്‍ പങ്കെടുക്കാത്ത വിവിധ സംസ്ഥാനങ്ങളിലെ 80ലധികം ഭാരവാഹികളെയാണ് സംഘടന സസ്‌പെൻഡ് ചെയ്തത്. വരും ദിവസങ്ങളില്‍ നടപടിക്ക് വിധേയരാകുന്നവരുടെ എണ്ണം 500 വരെ ഉയർന്നേക്കുമെന്നാണ് പാർട്ടി വൃത്തങ്ങളില്‍നിന്നുള്ള സൂചന.
നിലവില്‍ മധ്യപ്രദേശില്‍ നിന്നുള്ള 60ഓളം ഭാരവാഹികള്‍, കോണ്‍ഗ്രസ് ഭരിക്കുന്ന ഹിമാചല്‍ പ്രദേശില്‍നിന്നുള്ള 13 പേർ, ഹരിയാനയില്‍നിന്നുള്ള 10 പേർ എന്നിവർക്കെതിരെയാണ് നടപടിയെടുത്തത്. മറ്റ് സംസ്ഥാനങ്ങളിലെ ഭാരവാഹികളുടെ പട്ടികയും നേതൃത്വം പരിശോധിച്ചുവരികയാണ്. റാലിയിലും അതിന് മുന്നോടിയായി നടന്ന മാർച്ചിലും ദേശീയ, സംസ്ഥാന, ജില്ലാ തലങ്ങളിലെ ഭാരവാഹികള്‍ നിർബന്ധമായും പങ്കെടുക്കണമെന്നായിരുന്നു യൂത്ത് കോണ്‍ഗ്രസിന്റെ നിർദേശം.
പങ്കാളിത്തം ഉറപ്പാക്കാൻ ഡല്‍ഹിയിലെ മിന്റോ റോഡിലുള്ള കേന്ദ്രത്തില്‍ ബാർകോഡ് സ്കാനറുകളും ഏർപ്പെടുത്തിയിരുന്നു. പ്രവർത്തകരുടെ ഹാജർ ഡിജിറ്റലായി രേഖപ്പെടുത്തുന്നതിനായി സംഘടനയുടെ ഔദ്യോഗിക ആപ്പില്‍ രജിസ്റ്റർ ചെയ്യാനും നിർദേശിച്ചു. രാഹുല്‍ ഗാന്ധിയുടെ മാർച്ചില്‍ പങ്കെടുക്കാനായി മിന്റോ റോഡില്‍ 15,000ത്തോളം പ്രവർത്തകർ എത്തിയെന്നാണ് യൂത്ത് കോണ്‍ഗ്രസിന്റെ അവകാശവാദം. എന്നാല്‍ ഔദ്യോഗിക ആപ്പില്‍ രജിസ്റ്റർ ചെയ്തത് വെറും 2,831 പേർ മാത്രമാണ്.
ഇന്റർനെറ്റ് വേഗതക്കുറവ് രജിസ്ട്രേഷനെ ബാധിച്ചിട്ടുണ്ടെന്ന് പരിശോധനയില്‍ കണ്ടെത്തിയിട്ടുണ്ട്. എന്നിരുന്നാലും കൃത്യമായ കാരണങ്ങളില്ലാതെ നിരവധി ഭാരവാഹികള്‍ പരിപാടിയില്‍നിന്ന് വിട്ടുനിന്നതായി പാർട്ടി വിലയിരുത്തി. ഇതോടെയാണ് ആദ്യഘട്ടത്തില്‍ 80ലധികം പേർക്കെതിരെ സസ്‌പെൻഷൻ നടപടി സ്വീകരിച്ചത്. മറ്റ് സംസ്ഥാനങ്ങളിലെ പട്ടിക കൂടി പരിശോധിക്കുന്നതോടെ നടപടി നേരിടുന്നവരുടെ എണ്ണം ഉയർന്നേക്കും. റാലിയിലെ പങ്കാളിത്തം ഉറപ്പാക്കാൻ സംഘടന സ്വീകരിച്ച കർശന നിലപാടാണ് ഇപ്പോള്‍ യൂത്ത് കോണ്‍ഗ്രസിനുള്ളില്‍ കൂട്ടനടപടിയിലേക്ക് നയിച്ചിരിക്കുന്നത്.
