കോട്ടയം: ഒട്ടുമിക്ക പേർക്കും ചായയേക്കാള്‍ ഇഷ്ടം കട്ടൻ കാപ്പിയായിരിക്കും.
കാപ്പി മിതമായി കുടിക്കുന്നതിലൂടെ ഊർജം നിലനിർത്താനും ഫാറ്റി ലിവറിന്റെ സാധ്യത കുറയ്ക്കാനും സാധിക്കുമെങ്കിലും എല്ലാവരുടെയും ശരീരത്തിന് ഒരേപോലെ നല്ലതാവണമെന്നില്ല.
കാപ്പി നല്ലതല്ലെന്ന് മനസ്സിലാക്കാൻ ശരീരത്തില്‍ വരുന്ന ചില മാറ്റങ്ങള്‍ ശ്രദ്ധിച്ചാല്‍ മതി. അവ ഏതൊക്കെയാണെന്ന് നോക്കാം.
1. നിരന്തരമായ അസിഡിറ്റിയും വയറ്റിലെ അസ്വസ്ഥതകളും
വയറ്റിലെ ആസിഡിന്റെ ഉത്പാദനം വർധിപ്പിക്കാൻ കട്ടൻ കാപ്പി കാരണമാകും. ദഹനപ്രശ്നത്തിന്റെ ഭാഗമായി വയറ്റില്‍ ഗ്യാസ് നിറയുന്ന പ്രശ്നങ്ങള്‍ പലർക്കുമുണ്ടാകാറുണ്ട്. എന്നാല്‍ വെറും വയറ്റില്‍ കാപ്പി കുടിക്കുമ്പോള്‍ നെഞ്ചെരിച്ചില്‍, വയറുവീർപ്പ്, ഓക്കാനം, വയറുവേദന എന്നിവ ഉണ്ടാകുന്നുണ്ടെങ്കില്‍ കാപ്പി ഒഴിവാക്കുന്നതാണ് നല്ലത്.
2. കാരണമില്ലാത്ത ഉത്കണ്ഠയും അസ്വസ്ഥതയും
കാരണമില്ലാത്ത ഉത്കണ്ഠയും അസ്വസ്ഥതയും മറ്റും ഇന്ന് പലരിലും കാണുന്നതാണ്. എന്നാല്‍ ഇത് കാപ്പികുടിക്കുന്നത് കൊണ്ടും വരാമെന്നാണ് പഠനങ്ങള്‍ വ്യക്തമാക്കുന്നത്. അതായത്, കാപ്പിയിലെ കഫീൻ നാഡീവ്യൂഹത്തെ ഉത്തേജിപ്പിക്കുന്നുണ്ട്. ഇത് സെൻസിറ്റീവായ ആളുകളില്‍ ഉത്കണ്ഠ, അസ്വസ്ഥത, പെട്ടെന്നുള്ള ദേഷ്യം, ഹൃദയമിടിപ്പ് വർധിക്കല്‍ എന്നിവയ്ക്ക് വഴിവച്ചേക്കാം. പലപ്പോഴും ജോലിയുടെ സമ്മർദമായി നമ്മള്‍ തെറ്റിധരിക്കുന്ന ഈ ലക്ഷണങ്ങള്‍ക്ക് പിന്നില്‍ കാപ്പിയാകാം കാരണം.
3. ഉറക്കക്കുറവും അസ്വസ്ഥമായ ഉറക്കവും
ഉറക്കക്കുറവും സ്ട്രെസ്സുമെല്ലാം ജോലി കാരണവും മറ്റ് വ്യക്തിപരമായ പ്രശ്നങ്ങള്‍ കാരണമെല്ലാം പലരിലും വരാറുണ്ട്. എന്നാല്‍ ഇതിന് ചില സമയങ്ങളില്‍ നിങ്ങള്‍ കുടിക്കുന്ന കാപ്പിയും കാരണമാകാറുണ്ട്. ഉച്ചയ്ക്ക് മുമ്പ് കാപ്പി കുടിച്ചാല്‍ പോലും അതിന്റെ ഫലം ശരീരത്തില്‍ മണിക്കൂറുകളോളം നിലനില്‍ക്കും. ഇതുവഴി നിങ്ങളുടെ നീണ്ട ഉറക്കത്തെ ബാധിച്ച്‌ രാത്രിയില്‍ പലതവണ ഞെട്ടി എഴുന്നേല്‍ക്കാൻ ഇടയാക്കിയേക്കാം. കൂടാതെ എത്ര സമയം ഉറങ്ങിയിട്ടും ഉറക്കം മതിയാവുന്നില്ലെങ്കിലോ ക്ഷീണം കൂടുന്നുണ്ടെങ്കിലോ കാപ്പി ഒരു കാരണമായേക്കാം.
4. തലവേദന, ക്ഷീണം, ഏകാഗ്രതക്കുറവ്
കാപ്പി സ്ഥിരമായി കുടിക്കുന്നവർക്ക് കാപ്പി ഒരു അഡിക്ഷൻ ആയേക്കാം. പതിവായി കുടിക്കുമ്പോള്‍ ശരീരം കഫീനെ ആശ്രയിക്കാൻ തുടങ്ങുന്നു. കാപ്പി കുടിക്കാതിരുന്നാല്‍ തലവേദന, ക്ഷീണം, ഏകാഗ്രതക്കുറവ് എന്നിവ അനുഭവപ്പെടാം. ഈ പോയന്റില്‍ കാപ്പി അഡിക്ഷനായെന്ന് മനസ്സിലാക്കണം. കാപ്പി കുടിച്ചതിന് ശേഷം ശരീരത്തില്‍ ഇത്തരം അസ്വസ്ഥതകള്‍ അനുഭവപ്പെടുന്നുണ്ടെങ്കില്‍ അളവ് കുറയ്ക്കുകയോ പൂർണമായി ഒഴിവാക്കുകയോ ചെയ്യുന്നതാണ് നല്ലത്.
