തിരുവനന്തപുരം: തൃശ്ശൂർ കയ്പ്പമംഗലം ദേശീയപാതയില് ഉണ്ടായ വാഹനാപകടത്തില് എട്ട് വിദ്യാർത്ഥികള് മരിച്ച ദാരുണ സംഭവത്തിന്റെ പശ്ചാത്തലത്തില്, കേരളത്തിലെ ദേശീയപാതയിലെ സുരക്ഷാ ക്രമീകരണങ്ങള് അടിയന്തരമായി പരിശോധിക്കണമെന്ന് ആവശ്യപ്പെട്ട് കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരിക്ക് മുഖ്യമന്ത്രി വി ഡി സതീശൻ കത്തയച്ചു.
അപകടസാധ്യതയുള്ള മേഖലകളില് കൃത്യമായ പരിശോധന നടത്തണമെന്നും സുരക്ഷ ഉറപ്പാക്കാൻ കേന്ദ്ര ഇടപെടല് അത്യാവശ്യമാണെന്നും മുഖ്യമന്ത്രി കത്തില് വ്യക്തമാക്കുന്നു.
ദേശീയപാത 66 ന്റെ വികസന പ്രവർത്തികള് നടക്കുന്ന ഘട്ടത്തില് യാത്രക്കാർ നേരിടുന്ന സുരക്ഷാ ഭീഷണികള് കത്തില് പ്രത്യേകം പരാമർശിക്കുന്നുണ്ട്.
നിർമാണ മേഖലകളില് എത്തുന്ന വാഹനങ്ങളുടെയും മറ്റ് ഭാരവാഹനങ്ങളുടെയും അശാസ്ത്രീയവും നിയമവിരുദ്ധവുമായ പാർക്കിംഗ് ഉടനടി തടയുന്നതിന് കർശന നിയന്ത്രണം ഏർപ്പെടുത്തണമെന്ന് മുഖ്യമന്ത്രി ആവശ്യപ്പെട്ടു.
താല്ക്കാലിക ഡൈവേർഷനുകളിലും ഇടുങ്ങിയ പാതകളിലും ആവശ്യമായ സുരക്ഷാ ബോർഡുകളും മുന്നറിയിപ്പ് സംവിധാനങ്ങളും സ്ഥാപിക്കണമെന്നും കത്തിലൂടെ ചൂണ്ടിക്കാണിക്കുന്നു.
