കോട്ടയം: തൊഴിലാളി പ്രസ്ഥാനത്തില്‍ നിന്ന് വളര്‍ന്ന് വ്യവസായ മന്ത്രിയുടെ കസേരയിലെത്തിയ പി. രാജീവ് വന്‍കിട മുതലാളിമാരുമായി ചങ്ങാത്തത്തിലാവുകയും പാവപ്പെട്ട തൊഴിലാളികളെ പൂര്‍ണ്ണമായി മറക്കുകയും ചെയ്‌തെന്ന രൂക്ഷവിമര്‍ശനവുമായി സി.ഐ.ടി.യു സംസ്ഥാന സമ്മേളനം.
സര്‍ക്കാറിന്റെ തൊഴിലാളി വിരുദ്ധ സമീപനങ്ങള്‍ വന്‍ തിരിച്ചടിയായെന്ന വിലയിരുത്തലുകള്‍ക്കിടെയാണ് സമ്മേളന വേദിയില്‍ മന്ത്രിമാര്‍ക്കെതിരെ പ്രതിനിധികള്‍ ആഞ്ഞടിച്ചത്. മന്ത്രിയെ സ്വന്തം യൂണിയന്‍ നേതാക്കള്‍ക്ക് പോലും നേരിട്ട് കാണാന്‍ സാധിക്കാത്ത അവസ്ഥയായിരുന്നുവെന്നും പ്രതിനിധികള്‍ തുറന്നടിച്ചു.
മന്ത്രിസ്ഥാനത്ത് എത്തിയതോടെ വ്യവസായ ലോകത്തിന്റെ താല്‍പ്പര്യ സംരക്ഷണത്തിന് മാത്രമാണ് പി. രാജീവ് മുന്‍ഗണന നല്‍കിയതെന്ന് പ്രതിനിധികള്‍ കുറ്റപ്പെടുത്തി. പരമ്പരാഗത മേഖലയായ കയര്‍ തൊഴിലാളികളുടെ ക്ഷേമത്തിനായി ഒരു കാര്യവും ചെയ്യാന്‍ മന്ത്രി തയ്യാറായില്ല. പാര്‍ട്ടി വിയര്‍പ്പൊഴുക്കി അധികാരത്തിലെത്തിച്ച മന്ത്രിമാര്‍ തൊഴിലാളികളുടെ പ്രശ്‌നങ്ങള്‍ കേള്‍ക്കാന്‍ പോലും തയ്യാറാകാതെ ആഡംബരങ്ങളില്‍ മുഴുകിയെന്നത് പ്രസ്ഥാനത്തിന് വലിയ നാണക്കേടുണ്ടാക്കിയെന്നും ചര്‍ച്ചയില്‍ വിമര്‍ശനമുയര്‍ന്നു.
തൊഴില്‍ വകുപ്പ് കൈകാര്യം ചെയ്ത വി. ശിവന്‍കുട്ടിയും പൂര്‍ണ്ണ പരാജയമായിരുന്നുവെന്ന് പ്രതിനിധികള്‍ അഭിപ്രായപ്പെട്ടു. തൊഴിലാളികളുടെ ന്യായമായ അവകാശങ്ങള്‍ സംരക്ഷിക്കുന്നതിലോ തൊഴില്‍ തര്‍ക്കങ്ങള്‍ പരിഹരിക്കുന്നതിലോ തൊഴില്‍ വകുപ്പ് കാര്യക്ഷമമായി ഇടപെട്ടില്ല. മുന്‍കാലങ്ങളില്‍ തൊഴിലാളികള്‍ക്ക് താങ്ങായിരുന്ന വകുപ്പ് ഇപ്പോള്‍ വെറും നോക്കുകുത്തിയായി മാറിയെന്നും സമ്മേളനത്തില്‍ സംസാരിച്ചവര്‍ ചൂണ്ടിക്കാട്ടി.
കഴിഞ്ഞ പിണറായി സര്‍ക്കാരിലെ ധനമന്ത്രിയായിരുന്ന കെ.എന്‍. ബാലഗോപാല്‍, തദ്ദേശ-എക്സൈസ് മന്ത്രിയായിരുന്ന എം.ബി. രാജേഷ് എന്നിവര്‍ക്കെതിരെയും രൂക്ഷമായ ആക്രമണമാണ് സമ്മേളനത്തിലുണ്ടായത്. ഇവരുടെയെല്ലാം തൊഴിലാളി വിരുദ്ധ സമീപനമാണ് തെരഞ്ഞെടുപ്പിലെ തിരിച്ചടിക്കും യു.ഡി.എഫിന്റെ കടന്നുവരവിനും കാരണമായതെന്ന് പ്രതിനിധികള്‍ തുറന്നടിച്ചു. ക്ഷേമബോര്‍ഡുകള്‍ക്ക് തുക അനുവദിക്കാതെ നിര്‍ജീവമാക്കിയതാണ് ധനവകുപ്പിന്റെ പ്രധാന വീഴ്ചയായി ചൂണ്ടിക്കാണിക്കപ്പെട്ടത്.
ധനമന്ത്രിയായിരുന്ന കെ.എന്‍. ബാലഗോപാലിനും കെ.എസ്.എഫ്.ഇ ചെയര്‍മാന്‍ കെ. വരദരാജനുമെതിരെ കടുത്ത പരിഹാസമാണ് കെ.എസ്.എഫ്.ഇ പ്രതിനിധികളുടെ ഭാഗത്തുനിന്നുണ്ടായത്. തൊഴിലാളികളെ നിരന്തരം ദുരിതത്തിലാക്കിയ ഇരുവര്‍ക്കും സര്‍ക്കാറിന്റെ വകയായി 'തൊഴിലാളി ശ്രേഷ്ഠ അവാര്‍ഡ്' നല്‍കി ആദരിക്കണമെന്ന് അവര്‍ പരിഹസിച്ചു. സ്ഥാപനത്തിന്റെ ഭരണം താറുമാറാക്കുകയും തൊഴിലാളി വിരുദ്ധ നിലപാടുകള്‍ അടിച്ചേല്‍പ്പിക്കുകയും ചെയ്തതാണ് ഇവരെ ചൊടിപ്പിച്ചത്.
സംസ്ഥാനത്ത് വിദേശ മദ്യ ബാറുകള്‍ അനുവദിക്കാന്‍ കാണിച്ച തിടുക്കമൊന്നും പരമ്പരാഗത ചെത്തുതൊഴിലാളികളുടെ കാര്യത്തില്‍ സര്‍ക്കാരിന് ഉണ്ടായില്ലെന്ന് എക്സൈസ് മന്ത്രിയായിരുന്ന എം.ബി. രാജേഷിനെതിരെ വിമര്‍ശനമുയര്‍ന്നു. സര്‍ക്കാറിന്റെ പുതിയ മദ്യനയം കള്ളുവ്യവസായത്തെയും അതിനെ മാത്രം നമ്പി ജീവിക്കുന്ന ആയിരക്കണക്കിന് തൊഴിലാളികളെയും കടുത്ത പ്രതിനിസന്ധിയിലേക്കാണ് തള്ളിയിട്ടത്. ചെത്തുതൊഴിലാളികളുടെ ക്ഷേമം ഉറപ്പാക്കാന്‍ മന്ത്രി ഒരു നടപടിയും എടുത്തില്ല.
ക്ഷേമ പെന്‍ഷനുകളും ബോര്‍ഡുകളിലെ ആനുകൂല്യങ്ങളും കൃത്യമായി വിതരണം ചെയ്യാത്തതാണ് സാധാരണക്കാരായ തൊഴിലാളികളെ ഭരണത്തില്‍ നിന്നും പാര്‍ട്ടില്‍ നിന്നും അകറ്റിയത്. അടിസ്ഥാന വിഭാഗങ്ങളുടെ പിന്തുണ നഷ്ടപ്പെട്ടതാണ് കഴിഞ്ഞ നിയമസഭാ തെരഞ്ഞെടുപ്പിലെ പരാജയത്തിലേക്ക് നയിച്ചത്. തൊഴിലാളി നേതാക്കള്‍ എന്ന് അവകാശപ്പെട്ടിരുന്ന മന്ത്രിമാര്‍ ഭരണത്തിലെത്തിയപ്പോള്‍ കോര്‍പ്പറേറ്റുകളുടെ താല്‍പ്പര്യം മാത്രം സംരക്ഷിച്ചതാണ് ജനരോഷത്തിന് ഇടയാക്കിയത്.
ഒന്നാം പിണറായി സര്‍ക്കാറിന്റെ ജനക്ഷേമ പ്രവര്‍ത്തനങ്ങളാണ് രണ്ടാം പിണറായി സര്‍ക്കാരിന്റെ ഭരണത്തുടര്‍ച്ചയ്ക്ക് വഴിയൊരുക്കിയതെങ്കില്‍, രണ്ടാം സര്‍ക്കാറിന്റെ കടുത്ത തൊഴിലാളി വിരുദ്ധതയാണ് വിക്കറ്റ് വീഴ്ത്തിയതെന്ന് സമ്മേളനം വിലയിരുത്തി. രണ്ടാം പിണറായി സര്‍ക്കാറിന്റെ പ്രവര്‍ത്തനങ്ങള്‍ പ്രതിപക്ഷ നേതാവായിരുന്ന വി.ഡി. സതീശന്റെ നേതൃത്വത്തിലുള്ള യു.ഡി.എഫ് സര്‍ക്കാരിന് അധികാരത്തിലെത്താന്‍ വഴിയൊരുക്കുകയായിരുന്നെന്ന് പ്രതിനിധികള്‍ കുറ്റപ്പെടുത്തി.
തൊഴിലാളിവര്‍ഗ്ഗ പ്രസ്ഥാനത്തിന്റെ അടിത്തറ ഇളക്കുന്ന രീതിയിലാണ് ജനപ്രതിനിധികളും മന്ത്രിമാരും പെരുമാറിയത്. അടിത്തട്ടിലെ തൊഴിലാളികളുടെ വികാരം മനസ്സിലാക്കാന്‍ പാര്‍ട്ടി നേതൃത്വവും തയ്യാറായില്ല. തെരഞ്ഞെടുപ്പ് തോല്‍വിക്ക് ശേഷമെങ്കിലും ഇത്തരം പാളിച്ചകള്‍ തിരുത്തി മുന്നോട്ടുപോയില്ലെങ്കില്‍ വലിയ പ്രത്യാഘാതം നേരിടേണ്ടി വരുമെന്ന മുന്നറിയിപ്പും സമ്മേളന പ്രതിനിധികള്‍ നല്‍കി.
നേതൃത്വത്തിന്റെ കണ്ണ് തുറപ്പിക്കുന്ന തരത്തിലായിരുന്നു സി.ഐ.ടിയു സംസ്ഥാന സമ്മേളനത്തിലെ പൊതുചര്‍ച്ചകള്‍. സ്വന്തം മന്ത്രിമാര്‍ക്കെതിരെ ഉയര്‍ന്നുവന്ന കടുത്ത പ്രതിഷേധം പാര്‍ട്ടിയിലും വലിയ ചര്‍ച്ചകള്‍ക്ക് വഴിവെക്കും. പരമ്പരാഗത മേഖലകളെയും തൊഴിലാളി ക്ഷേമത്തെയും അവഗണിച്ച്‌ മുന്നോട്ടുപോകാന്‍ കഴിയില്ലെന്ന ശക്തമായ സന്ദേശമാണ് കോട്ടയം സമ്മേളനത്തില്‍ നിന്നും പുറത്തുവരുന്നത്.
