ചേർത്തല: ചേർത്തല താലൂക്ക് ഓഫീസ് കെട്ടിടത്തിന്‍റെ സീലിങ് അടർന്നുവീണു. ലാൻഡ് റവന്യു തഹസില്‍ദാരുടെ കീഴിലുള്ള ഹൗസിങ് സെക്ഷനിലാണ് ബുധനാഴ്ച രാവിലെ പത്തിനുശേഷം അപകടമുണ്ടായത്.
കമ്പ്യൂട്ടറിന് മുകളിലേക്കടക്കം കോണ്‍ക്രീറ്റ് പാളികള്‍ അടർന്നുവീണെങ്കിലും ജീവനക്കാർ അത്ഭുതകരമായി രക്ഷപ്പെട്ടു. കെട്ടിടത്തിന് മുകളില്‍ സ്ഥാപിച്ച വലിയ വാട്ടർ ടാങ്കില്‍ നിന്ന് വെള്ളം ചോർന്ന് കോണ്‍ക്രീറ്റ് ദ്രവിച്ചതാണ് അപകടകാരണമെന്നാണ് പ്രാഥമിക നിഗമനം. സംഭവത്തെത്തുടർന്ന് ജീവനക്കാരെ ഉടൻ സുരക്ഷിത സ്ഥാനത്തേക്ക് മാറ്റി. ഇതിന് മുമ്പും കെട്ടിടത്തില്‍ നിന്ന് കോണ്‍ക്രീറ്റ് പാളി അടർന്നുവീണിരുന്നു. അന്ന് ജീവനക്കാർ എത്തുന്നതിന് തൊട്ടുമുമ്പായതിനാല്‍ ആളപായം ഒഴിവായി. എന്നാല്‍ കമ്പ്യൂട്ടറുകള്‍ക്കും ഫയലുകള്‍ക്കും കേടുപാടുകള്‍ സംഭവിച്ചു.
തുടർച്ചയായ അപകടങ്ങള്‍ക്കിടയിലും കെട്ടിടത്തിന്‍റെ സുരക്ഷ ഉറപ്പാക്കാൻ നടപടിയുണ്ടായില്ലെന്ന് ജീവനക്കാർക്ക് പരാതിയുണ്ട്. ദിവസവും നൂറുകണക്കിന് ആളുകള്‍ എത്തുന്ന കെട്ടിടത്തില്‍ അടിയന്തര അറ്റകുറ്റപ്പണി നടത്തണമെന്നും വാട്ടർ ടാങ്ക് മാറ്റി സ്ഥാപിക്കണമെന്നും ആവശ്യമുയർന്നിട്ടുണ്ട്.
അതേസമയം, പുതിയ കെട്ടിടത്തിനായുള്ള നടപടികള്‍ പുരോഗമിക്കുകയാണെന്ന് പി പ്രസാദ് എംഎല്‍എ അറിയിച്ചു. മുൻ സർക്കാരിന്‍റെ കാലത്ത് അനുമതി ലഭിച്ച പദ്ധതിയുടെ ഡിസൈനില്‍ ചില തിരുത്തലുകള്‍ വന്നതിനാലാണ് നിർമാണം വൈകിയത്. ഇത് പൂർത്തിയായാല്‍ ഉടൻ ടെൻഡർ നടപടികളിലേക്ക് കടക്കും. നിർമാണത്തിന് ഫണ്ട് തടസ്സമല്ല. നൂറുവർഷത്തിലധികം പഴക്കമുള്ള നിർമിതികള്‍ സംരക്ഷിക്കണമെന്ന ഉത്തരവുള്ളതിനാല്‍ പഴയ കെട്ടിടം നിലനിർത്തണോ പൊളിക്കണോ എന്നതില്‍ ആർക്കിടെക്റ്റ് പരിശോധന നടത്തിയ ശേഷമേ അന്തിമ തീരുമാനമെടുക്കാനാകൂ. എന്നാല്‍ പി ഡബ്ല്യു ഡി ആർക്കിടെക്റ്റ് ഇതുവരെ സ്ഥലം സന്ദർശിച്ചിട്ടില്ല.
