തിരുവനന്തപുരം: ഓപ്പറേഷൻ തൂഫാൻ വ്യാജമാണെന്ന മുൻ ഡി ജി പിയും തിരുവനന്തപുരം കോർപറേഷനിലെ ബിജെപി കൗണ്‍സിലറുമായ ആർ.
ശ്രീലേഖയുടെ പരാമർശത്തിനെതിരെ രൂക്ഷവിമർശനവുമായി ആഭ്യന്തരമന്ത്രി രമേശ് ചെന്നിത്തല. ഡിജിപി പദവിയിലിരുന്ന ഒരാള്‍ ഇത്തരത്തില്‍ സംസാരിക്കുന്നത് ശരിയാണോയെന്ന് ചിന്തിക്കണമെന്നും ശ്രീലേഖ പരാമർശം പിൻവലിച്ച്‌ മാപ്പുപറയണമെന്നും അദ്ദേഹം ആവശ്യപ്പെട്ടു. തിരുവനന്തപുരത്ത് മാദ്ധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.
'ശ്രീലേഖയ്ക്ക് എന്തു പറ്റി. ഡി.ജി.പി.യായി ഇരുന്ന ആളാണ്. ഇങ്ങനെ സംസാരിക്കുന്നത് ശരിയാണോ,അവർ ഇരുന്ന സ്ഥാനത്തെക്കുറിച്ച്‌ ചിന്തിക്കണ്ടേ? കേരള പൊലീസിന്റെ പ്രവർത്തനങ്ങളെക്കുറിച്ച്‌ അടിസ്ഥാനരഹിതമായ ആരോപണങ്ങള്‍ ഉന്നയിക്കുന്നത് ശരിയല്ല. ജൂണ്‍ രണ്ടിന് ആരംഭിച്ച ഓപ്പറേഷൻ തൂഫാനെ കേരളത്തിലെ ജനങ്ങള്‍ രാഷ്ട്രീയഭേദമന്യേ പിന്തുണയ്ക്കുന്നുണ്ട്‌. ലഹരിക്കെതിരായ പോരാട്ടത്തില്‍ ജനങ്ങളുടെ പിന്തുണയും പങ്കാളിത്തവും നിർണായകമാണ്. കേരള പൊലീസിന്റെ പ്രവർത്തനങ്ങളെക്കുറിച്ച്‌ തെറ്റായ ധാരണ സൃഷ്ടിക്കുന്ന പരാമർശങ്ങള്‍ അംഗീകരിക്കാനാവില്ല. ശ്രീലേഖ രാഹുല്‍ ഗാന്ധിക്കെതിരെ നടത്തിയ പരാമർശവും പിൻവലിച്ച്‌ മാപ്പുപറയണം. ഒരു ദിവസം രാജിവയ്ക്കും, പിന്നെ പിൻവലിക്കും. അവർക്ക് എന്തോ ഗുരുതര പ്രശ്നമുണ്ട്'ചെന്നിത്തല പറഞ്ഞു.
എൻഎസ്‌യു നേതാവ് ആതിരയ്‌ക്കെതിരെയുള്ള ഡല്‍ഹി പൊലീസ് നടപടിയെയും ആഭ്യന്തരമന്ത്രി രൂക്ഷമായി വിമർശിച്ചു. 'ഡല്‍ഹി പൊലീസിന്റെ പെരുമാറ്റം വളരെ മോശമായിരുന്നു. ആതിരയെ അതിക്രൂരമായി മർദിച്ചു. ശരീരമാകെ പരിക്കുകളുണ്ട്‌. വസ്ത്രങ്ങള്‍ കീറി. പരാതി നല്‍കിയിട്ടും ബന്ധപ്പെട്ടവർ ശ്രദ്ധിച്ചില്ല. തുടർന്നാണ്‌ ആതിര പരാതി എനിക്കും സംസ്ഥാന പൊലീസ് മേധാവിക്കും അയച്ചത്‌. ആതിരയുടെ പരാതിയില്‍ മ്യൂസിയം പൊലീസ് എഫ്.ഐ.ആർ രജിസ്റ്റർ ചെയ്തിട്ടുണ്ട്. വിഷയത്തില്‍ നിയമപരമായ നടപടികള്‍ സ്വീകരിക്കാനുള്ള സാധ്യതകള്‍ പരിശോധിച്ചുവരികയാണ്'- മന്ത്രി അറിയിച്ചു.
സമരങ്ങളില്‍ പങ്കെടുക്കുന്നതും പ്രതിഷേധിക്കുന്നതും കുറ്റകരമായ കാര്യമല്ലെന്നും . ജനാധിപത്യത്തില്‍ പ്രതിഷേധിക്കാനുള്ള അവകാശം പ്രധാനമാണ്. അതിന്റെ പേരില്‍ ഒരാള്‍ക്കെതിരെ അതിക്രമം നടക്കുകയോ പരാതി അവഗണിക്കപ്പെടുകയോ ചെയ്യുന്നത് ഗൗരവത്തോടെ കാണേണ്ട വിഷയമാണെന്നും രമേശ് ചെന്നിത്തല പറഞ്ഞു.
