കോട്ടയം: കഴിഞ്ഞ സർക്കാരിന്റെ കാലത്ത് ഉമ്മൻ ചാണ്ടിക്ക് നീതി കൊടുത്തിട്ടില്ലെന്ന് ചാണ്ടി ഉമ്മൻ എംഎല്‍എ. ഉമ്മൻചാണ്ടിയെ അന്യായമായി ക്രൂശിച്ചുവെന്നും കള്ളക്കേസ് ഉണ്ടാക്കി അദ്ദേഹത്തെ മാനസികമായും ശാരീരികമായും തകർത്തുവെന്നും ചാണ്ടി ഉമ്മൻ പറഞ്ഞു.
ഇതുവരെയും ഉമ്മൻചാണ്ടിക്കും നീതി കൊടുത്തിട്ടില്ല. ഉമ്മൻചാണ്ടിക്ക് നീതി കൊടുത്തില്ലെന്ന് പറഞ്ഞ് മറ്റൊരാളെ വേട്ടയാടുന്നതും ശരിയല്ല. കോണ്‍ഗ്രസ്സിന്റെ ശൈലി അത് അല്ലെന്നും ചാണ്ടി ഉമ്മൻ പറഞ്ഞു.
പിണറായി വിജയനെതിരായ കേസ് നിയമത്തിന്റെ വഴിക്ക് പോകട്ടെ. ഇഡി പലസ്ഥലത്തും രാഷ്ട്രീയമായ വേട്ടയാടല്‍ നടത്തുന്നുണ്ട്. പിണറായിക്കെതിരെ അങ്ങനെയൊരു വേട്ടയാടല്‍ ഉണ്ടാകാൻ പാടില്ല. കോടതിയിലെ എജിയുടെ നിലപാട് സംബന്ധിച്ച്‌ ഇപ്പോള്‍ അഭിപ്രായം പറയുന്നില്ല. അത് പറയേണ്ടിടത്ത് പറയും. പരസ്യമായി പറയില്ല. പാർട്ടിക്ക് അകത്തു പറയും. ആളുകള്‍ പലരും കേസ് സെറ്റില്‍ ചെയ്യുന്നു എന്ന് പറയുന്നുണ്ട്. ഇങ്ങനെ ആക്ഷേപം ഉയരുമ്പോള്‍ കൂടുതല്‍ സത്വരമായ നടപടി സർക്കാരിന്റെ ഭാഗത്തുനിന്നുണ്ടാവണം. ഇല്ലെങ്കില്‍ ആക്ഷേപങ്ങള്‍ നേരിടുന്നതില്‍ നേതാക്കള്‍ക്ക് ബുദ്ധിമുട്ടുണ്ടാകുമെന്നും ചാണ്ടി ഉമ്മൻ പറഞ്ഞു.
