തിരുവനന്തപുരം: തിരുവനന്തപുരം ചാലയിലെ സ്വർണക്കവർച്ചാ കേസില്‍ നിർണായക വിവരങ്ങള്‍ പൊലീസിന്.
ജ്വല്ലറി ഉടമ നന്ദകുമാറുമായി അടുത്ത ബന്ധമുള്ളവരും പ്രതികളെ സഹായിച്ചെന്നാണ് പൊലീസിന്റെ കണ്ടെത്തല്‍. ബൈക്കില്‍ പോയ കവർച്ചാസംഘം പിന്നീട് തമിഴ്നാട്ടിലേക്ക് കടന്നത് കാറിലാണ്.
നിലവില്‍ കസ്റ്റഡിയിലുള്ളത് അഞ്ചുപേരാണ്. ഇവരില്‍ നിന്നും 450 ഗ്രാം സ്വർണം പിടിച്ചെടുത്തിട്ടുണ്ട്. വാഹനത്തിലുണ്ടായിരുന്ന രാജീവിനെ നോട്ടീസ് നല്‍കി വിട്ടയച്ചിരിക്കുകയാണ്.
വയനാട്ടില്‍ നിന്ന് പിടിയിലായ മറ്റു മൂന്നുപേരെ തിരുവനന്തപുരത്ത് എത്തിക്കും. കൂടുതല്‍ പേരുടെ പങ്കിനെക്കുറിച്ച്‌ അന്വേഷണം തുടരുകയാണ്.
കവർച്ച സംഘം ബൈക്കില്‍ തിരുവനന്തപുരത്തുനിന്ന് തമിഴ്നാട് അതിർത്തി വരെ സഞ്ചരിച്ചു. പിന്നീട് ബൈക്ക് ഉപേക്ഷിച്ച്‌ കാറില്‍ പ്രതികള്‍ സ്വർണവുമായി തമിഴ്നാട്ടിലേക്ക് പോകുകയായിരുന്നു.
കാർ ബംഗളൂരുവില്‍ ടോള്‍ പ്ലാസ കടന്നതോടെ പൊലീസിന് വിവരം ലഭിക്കുകയായിരുന്നു. ശനിയാഴ്ച ഉച്ചയോടെ കവർച്ച സംഘം മൈസൂരില്‍ എത്തി, അവിടെ നിന്നും വൈകിട്ട് കേരളത്തിലേക്ക് എത്തുകയായിരുന്നു.
പ്രതികളെ കണ്ടെത്താൻ നിർണായകമായത് ഹോണ്ട ബൈക്ക് കേന്ദ്രീകരിച്ച അന്വേഷണമാണ്. തുടർന്ന് ബൈക്ക് ഉടമ അനിലെന്ന് തിരിച്ചറിയുകയായിരുന്നു. ഇയാളെ കേന്ദ്രീകരിച്ചുള്ള അന്വേഷണം പ്രതികള്‍ രക്ഷപ്പെട്ട വഴികളിലേക്ക് എത്തിക്കുകയായിരുന്നു.
കവർച്ച നടത്തിയത് എത്രത്തോളം സ്വർണമെന്ന അന്വേഷണത്തിലാണ് പൊലീസ്. സ്വർണം പൊട്ടിക്കല്‍ സംഘവുമായി ബന്ധമില്ലെന്നാണ് പൊലീസിൻ്റെ പ്രാഥമിക നിഗമനം. കൂടുതല്‍ പേരുടെ പങ്കിനെക്കുറിച്ച്‌ അന്വേഷണം വിപുലപ്പെടുത്തിയിരിക്കുകയാണ് പൊലീസ്.
