കുമരകം: പഞ്ചായത്ത് എട്ടാം വാർഡ് പൊങ്ങലക്കരി പ്രദേശത്ത് ഏഴ് ദിവസമായി കുടിവെള്ള വിതരണം മുടങ്ങിയതിൽ പ്രതിഷേധിച്ച് വാട്ടർ അതോറിറ്റി എക്സിക്യൂട്ടീവ് എഞ്ചിനീയർ കെ.എസ്.അനിൽരാജിന് വാർഡ് മെമ്പർ നീതു റെജിയുടെ നേതൃത്വത്തിൽ നിവേദനം നൽകി.
മറ്റ് വാർഡുകളിൽ ഒന്നിടവിട്ട ദിവസങ്ങളിൽ വെള്ളം ലഭിക്കുമ്പോഴും
150 ഓളം കുടുംബങ്ങൾ താമസിക്കുന്ന പൊങ്ങലക്കരി പ്രദേശത്ത് വെള്ളം ലഭിക്കുന്നില്ലെന്ന് നിവേദനത്തിൽ പറയുന്നു. അട്ടിപ്പീടിക ജംഗ്ഷനിൽ 7, 8 വാർഡുകളിലേക്കുള്ള വെള്ളം ക്രമീകരിക്കാൻ എന്ന വ്യാജേന അനധികൃതമായി വാൽവ് സ്ഥാപിച്ചതാണ് പൊങ്ങലക്കരിയിൽ വെള്ളം മുടങ്ങാൻ കാരണമെന്നും പരാതിയിൽ ചൂണ്ടിക്കാട്ടി.
അനധികൃത വാൽവ് അടിയന്തരമായി എടുത്തുമാറ്റി പൊങ്ങലക്കരിയിൽ കുടിവെള്ള വിതരണം പുനഃസ്ഥാപിക്കണമെന്ന് ആവശ്യപ്പെട്ടാണ് നിവേദനം നൽകിയത്. പഞ്ചായത്തംഗങ്ങളായ പി.കെ. സേതു, വി.കെ. സുനിത്ത് എന്നിവരും ഒപ്പമുണ്ടായിരുന്നു.
ഒരാഴ്ചയ്ക്കകം വിദഗ്ധ തൊഴിലാളികളെ എത്തിച്ച് അനധികൃത വാൽവ് മാറ്റി സ്ഥാപിച്ച് കുടിവെള്ള വിതരണം സാധാരണ നിലയിലാക്കുമെന്ന് എക്സിക്യൂട്ടീവ് എഞ്ചിനീയർ അനിൽരാജ് കെ.എസ് ഉറപ്പ് നൽകിയതായി മെംമ്പർ അറിയിച്ചു.
