കോട്ടയം: പുതിയ തലമുറയിലെ യുവാക്കള്ക്കിടയില് മദ്യപാനശീലത്തില് കാര്യമായ കുറവ് രേഖപ്പെടുത്തുന്നത് ബീവറേജസ് കോർപ്പറേഷനെ ആശങ്കയിലാഴ്ത്തുന്നു.
ഇക്കുറി ഓണക്കാല വിറ്റുവരവില് കുറവുണ്ടാകുമോ എന്നതാണ് കോർപ്പറേഷന്റെ പ്രധാന ഭയം. മദ്യപിക്കുന്നതിന് പകരം എം.ഡി.എം.എ., കഞ്ചാവ്, എല്.എസ്.ഡി. സ്റ്റാമ്പ് തുടങ്ങിയവ ഉപയോഗിക്കുന്ന യുവാക്കളുടെ എണ്ണം ഏറിവരികയാണ്. മദ്യത്തിന് ലഹരി കുറവാണ് എന്ന ചിന്തയാണ് യുവാക്കളെ മറ്റ് ലഹരികളിലേക്ക് തിരിയാൻ പ്രേരിപ്പിക്കുന്നത്.
അതേസമയം, 'ഓപ്പറേഷൻ തൂഫാൻ' വഴി പോലീസും എക്സൈസും ശക്തമായ പരിശോധനകളാണ് നടത്തിവരുന്നത്. ഇതിനോടകം പതിനായിരത്തോളം കേസുകള് റിപ്പോർട്ട് ചെയ്യപ്പെട്ടു. പിടിയിലായവരില് ഭൂരിഭാഗവും യുവാക്കളാണ്. എന്നിരുന്നാലും, സിന്തറ്റിക് ലഹരിയുടെ അമിത ലാഭം കാരണം ഇതിന്റെ ഒഴുക്ക് ഇപ്പോഴും യുവാക്കള്ക്കിടയില് തുടരുന്നു. ഇത് മദ്യ വിപണിയിലും പ്രതിഫലിച്ചേക്കും .
പൊതുവെ ലാഭത്തില് പ്രവർത്തിക്കുന്ന ബെവ്കോ ഇത്തവണ നഷ്ടത്തിലാണ് എന്നാണ് റിപ്പോർട്ടുകള്. കഴിഞ്ഞ വർഷം മാർച്ച് 31-ന് ബെവ്കോ 124.10 കോടി രൂപ ലാഭം നേടിയിരുന്നു. എന്നാല് ഗാലനേജ് ഫീ ഏർപ്പെടുത്തിയതോടെ വിറ്റുവരവില് ഇടിവ് സംഭവിച്ചു. ഈ വർഷം മാർച്ച് 31-ന് 281.95 കോടി രൂപയുടെ നഷ്ടത്തിലാണ് ബെവ്കോ കണക്കുകള് അവസാനിപ്പിച്ചത്. എന്നാല് ഈ വിഷയത്തെ സാങ്കേതികമായ ഒരു പ്രശ്നമായാണ് സർക്കാർ കാണുന്നത്.
2025-ലെ ഓണക്കാലത്ത് 10 ദിവസങ്ങളിലായി ബെവ്കോ ഷോപ്പുകളിലൂടെയും വെയർഹൗസുകളിലൂടെയുമായി 826 കോടി രൂപയുടെ മദ്യമാണ് വിറ്റഴിച്ചത്. 2024-ലേതിനേക്കാള് (776 കോടി) 50 കോടിയോളം രൂപയുടെ അധിക വില്പ്പനയാണ്. ഉത്രാടദിനമാണ് ഏറ്റവും കൂടുതല് മദ്യവില്പ്പന നടക്കുന്ന ദിവസം. 2025-ലെ ഉത്രാടദിനത്തില് മാത്രം 137 കോടി രൂപയുടെ മദ്യവില്പ്പന നടന്നു. 2024-ലെ ഉത്രാടദിനത്തെ (126 കോടി) അപേക്ഷിച്ച് 11 കോടി രൂപയുടെ (9.21%) വർദ്ധനവാണ് ഇതിലൂടെ ഉണ്ടായത്.
ഓപ്പറേഷൻ തൂഫാൻ' ശക്തമായതോടെ വ്യാജ/സിന്തറ്റിക് ലഹരികളുടെ ലഭ്യത കുറയുകയും മദ്യവില്പ്പന വർദ്ധിക്കുകയും ചെയ്യുമെന്ന പ്രതീക്ഷയിലാണ് ജീവനക്കാർ. മികച്ച സാമ്പത്തിക പ്രകടനം കാഴ്ചവെയ്ക്കുന്ന സ്ഥാപനമായതിനാല് ലക്ഷത്തിലധികം രൂപയാണ് ഓരോ ജീവനക്കാരനും ഓണം ബോണസായി ലഭിക്കാറുള്ളത്. ഇത്തവണത്തെ പരമാവധി ബോണസ് തുക 1,05,000 രൂപയാണ്. മുൻവർഷത്തേക്കാള് 2,500 രൂപ കൂടുതലാണിത്.
