കോഴിക്കോട്: സർവകലാശാലയുടെ വിലക്ക് ലംഘിച്ച് എസ്എഫ്ഐ നേതാവ് ഐഷി ഘോഷിനെ പങ്കെടുപ്പിച്ച് പരിപാടി നടത്തിയ സംഭവത്തില് കാലിക്കറ്റ് സർവകലാശാലയില് നടപടി. എസ്എഫ്ഐ യൂണിറ്റ് സെക്രട്ടറി അഭിനന്ദിനെ ക്യാമ്പസില് നിന്നും ഹോസ്റ്റലില് നിന്നും പുറത്താക്കി. വൈസ് ചാൻസലറുടെ ഉത്തരവ് പ്രകാരം വകുപ്പ് മേധാവിയാണ് നടപടി സ്വീകരിച്ചത്.
ഐഷി ഘോഷിനെ പങ്കെടുപ്പിച്ചുള്ള ഡി.എസ്.യു മാഗസിൻ പ്രകാശനത്തിന് സർവകലാശാല ഹാള് അനുവദിക്കാത്തതിനെ തുടർന്നാണ് സംഭവങ്ങളുടെ തുടക്കം. ഹാള് അനുവദിക്കാത്തതില് പ്രതിഷേധിച്ച് എസ്എഫ്ഐ പ്രവർത്തകർ വൈസ് ചാൻസലറുടെ ചേംബറിന് മുന്നില് പ്രതിഷേധിച്ചിരുന്നു. തുടർന്ന് സർവകലാശാലയുടെ അനുമതിയില്ലാതെ ഹാളിന്റെ വാതില് ചവിട്ടിത്തുറന്ന് ഐഷി ഘോഷിനെ പങ്കെടുപ്പിച്ച് പരിപാടി നടത്തുകയായിരുന്നു. സർവകലാശാലയുടെ വിലക്ക് ലംഘിച്ച് പരിപാടി സംഘടിപ്പിച്ചതിന് പിന്നാലെയാണ് നടപടി ശക്തമായത്.
ഇതിനിടെ, രജിസ്ട്രാറുടെ പരാതിയുടെ അടിസ്ഥാനത്തില് അഭിനന്ദ് ഉള്പ്പെടെ നാല് എസ്എഫ്ഐ പ്രവർത്തകർക്കെതിരെ തേഞ്ഞിപ്പലം പൊലീസ് കേസെടുത്തിരുന്നു. വൈസ് ചാൻസലർ ഉള്പ്പെടെയുള്ളവരെ തടഞ്ഞുവച്ചെന്ന പരാതിയിലാണ് കേസ്. സർവകലാശാലയുടെ അനുമതി നിഷേധിച്ചിട്ടും പരിപാടിയുമായി മുന്നോട്ടുപോയതും തുടർന്ന് ഹാളിന്റെ വാതില് ചവിട്ടിത്തുറന്ന് പരിപാടി സംഘടിപ്പിച്ചതുമാണ് സംഭവത്തെ കൂടുതല് വിവാദത്തിലാക്കിയത്. ഇതിന് പിന്നാലെയാണ് എസ്എഫ്ഐ യൂണിറ്റ് സെക്രട്ടറിയെ ക്യാമ്പസില് നിന്നും ഹോസ്റ്റലില് നിന്നും പുറത്താക്കുന്ന നടപടിയുണ്ടായത്.
അതേസമയം, അഭിനന്ദിനെ തിരിച്ചെടുക്കുന്നതുവരെ പ്രതിഷേധം തുടരുമെന്നാണ് എസ്എഫ്ഐയുടെ നിലവിലെ ഭീഷണി. ഇതോടെ കാലിക്കറ്റ് സർവകലാശാലയില് എസ്എഫ്ഐയും സർവകലാശാല അധികൃതരും തമ്മിലുള്ള തർക്കം കൂടുതല് രൂക്ഷമാകാനുള്ള സാധ്യതയാണ് ഉയരുന്നത്.
