പ്രമേഹരോഗികള് ബ്ലഡ് ഷുഗർ അളവ് നിയന്ത്രിക്കേണ്ടത് വളരെ പ്രധാനമാണ്. അത് കൊണ്ട് തന്നെ ജിഐ കുറഞ്ഞ ഭക്ഷണങ്ങള് കഴിക്കാൻ ശ്രദ്ധിക്കുക.
സാധാരണഗതിയില്, ഭക്ഷണം കഴിക്കുമ്പോഴെല്ലാം രക്തത്തിലെ പഞ്ചസാരയുടെ അളവ് വർദ്ധിക്കാറുണ്ട്. എന്നാല്, പെട്ടെന്നുണ്ടാകുന്ന ഇത്തരം വലിയ വർദ്ധനവ് ശരീരത്തിലെ അവയവങ്ങളെ ദോഷകരമായി ബാധിച്ചേക്കാമെന്നതിനാല് പഞ്ചസാരയുടെ അളവ് നിയന്ത്രിക്കേണ്ടത് അത്യന്താപേക്ഷിതമാണ്. ഇത് ആന്തരിക അവയവങ്ങള്ക്ക് കേടുപാടുകള് വരുത്താൻ മാത്രമല്ല, മൊത്തത്തിലുള്ള മെറ്റബോളിക് ആരോഗ്യത്തെ (metabolic health) അപകടത്തിലാക്കാനും സാധ്യതയുണ്ട്.
രക്തത്തിലെ പഞ്ചസാരയുടെ അളവില് അസന്തുലിതാവസ്ഥയുണ്ടായാല് അത് മെറ്റബോളിസത്തില് മാറ്റങ്ങള് വരുത്തിയേക്കാം. രക്തത്തിലെ ഗ്ലൂക്കോസിന്റെ അളവ് പെട്ടെന്ന് കുത്തനെ ഉയരുന്ന സാഹചര്യം ആവർത്തിച്ചുണ്ടാകുമ്പോഴാണ് ഇത് സംഭവിക്കുന്നത്. ഭക്ഷണം കഴിക്കുന്ന ക്രമം രക്തത്തിലെ പഞ്ചസാരയുടെ അളവില് നേരിട്ട് സ്വാധീനം ചെലുത്തുന്നുവെന്ന് 'ഫ്രോണ്ടിയേഴ്സ് ഇൻ കാർഡിയോവാസ്കുലാർ മെഡിസിൻ' (Frontiers in Cardiovascular Medicine) എന്ന ജേണല് വ്യക്തമാക്കുന്നു.
ഭക്ഷണക്രമത്തില് വലിയ മാറ്റങ്ങളൊന്നും വരുത്താതെ തന്നെ രക്തത്തിലെ പഞ്ചസാരയുടെ അളവിലുണ്ടാകുന്ന പെട്ടെന്നുള്ള വർദ്ധനവ് നിയന്ത്രിക്കാൻ സാധിക്കും. ഇതിനായി, ഭക്ഷണത്തിലെ കാർബോഹൈഡ്രേറ്റുകളെയും മറ്റ് ഘടകങ്ങളെയും ക്രമീകരിക്കാൻ സഹായിക്കുന്ന 'ഫൈബർ-ഫസ്റ്റ്' (ആദ്യം നാരുകള് അടങ്ങിയ ഭക്ഷണം കഴിക്കുക) രീതി പിന്തുടരുന്നതാണ് ഉചിതം.
ഏതെങ്കിലും തരത്തിലുള്ള ഭക്ഷണം കഴിച്ചുകഴിഞ്ഞാല് പാൻക്രിയാസ് നിശ്ചിത അളവില് ഇൻസുലിൻ ഉല്പ്പാദിപ്പിക്കുകയും അത് രക്തത്തിലെ പഞ്ചസാരയുടെ അളവില് മാറ്റമുണ്ടാക്കുകയും ചെയ്യുന്നു. ഈ വർദ്ധനവ് അമിതമാകുമ്പോള് രക്തത്തിലെ പഞ്ചസാരയുടെ അളവ് കുത്തനെ ഉയരുകയും, അത് ഊർജ്ജ നില, വിശപ്പ്, ദീർഘകാലാടിസ്ഥാനത്തിലുള്ള മെറ്റബോളിക് ആരോഗ്യം എന്നിവയെ ബാധിക്കുകയും ചെയ്തേക്കാം. രക്തത്തിലെ പഞ്ചസാരയുടെ അളവിലുണ്ടാകുന്ന ഈ പെട്ടെന്നുള്ള വർധനവ് അമിതമായാല്, ഓക്സിഡേറ്റീവ് സ്ട്രെസ്സും ശരീരത്തിനുള്ളിലെ വീക്കത്തിന്റെ (inflammation) അളവും വർധിച്ചേക്കാം.
നാരുകള് ധാരാളമടങ്ങിയ ഭക്ഷണങ്ങള് കഴിക്കുന്നതിന് മുൻപായി അമിത അളവില് കാർബോഹൈഡ്രേറ്റ് കഴിച്ചാല് രക്തത്തിലെ ഗ്ലൂക്കോസിന്റെ അളവ് നിയന്ത്രണാതീതമായേക്കാമെന്ന് 'ഡയബറ്റിസ്, ഒബിസിറ്റി ആൻഡ് മെറ്റബോളിസം ജേണലില്' പ്രസിദ്ധീകരിച്ച പഠനത്തില് പറയുന്നു.
രക്തത്തിലെ പഞ്ചസാരയുടെ അളവ് പെട്ടെന്ന് ഉയരുന്നത് തടയാൻ സഹായിക്കുന്നതിനാല്, ലയിക്കുന്ന നാരുകള് (soluble fibre) അടങ്ങിയ ഭക്ഷണം കഴിക്കുന്നത് പ്രധാനമാണെന്ന് 'ഫുഡ്സ് ജേണല്' (Foods Journal) വ്യക്തമാക്കുന്നു. വെള്ളരിക്ക, ക്യാരറ്റ്, തക്കാളി, ലെറ്റ്യൂസ്, ചീര എന്നിവ ഡയറ്റില് ഉള്പ്പെടുത്തുക.
