തിരുവനന്തപുരം: വിവിധ സംസ്ഥാനങ്ങളിലെ പുതിയ ചുമതലക്കാരെ (പ്രഭാരിമാർ) പ്രഖ്യാപിച്ച് ബി ജെ പി. കേരളത്തിന്റെ ചുമതലയില്നിന്ന് പ്രകാശ് ജാവ്ദേക്കറെ മാറ്റിയതാണ് ഇക്കൂട്ടത്തില് ഏറ്റവും പ്രധാനം.
കർണാടകയില്നിന്നുള്ള രാജ്യസഭാ എം പിയും ആർ എസ് എസ് നേതാവുമായ ബി ജെപി ദേശീയ വൈസ് പ്രസിഡന്റ് പ്രൊഫ. എം നാഗരാജുവാണ് ആണ് പുതിയ പ്രഭാരി. സഹപ്രഭാരി സ്ഥാനത്തുനിന്നും അപരാജിത സാരംഗിയെയും മാറ്റി. തമിഴ്നാട്ടില് നിന്നുള്ള ദേശീയ സെക്രട്ടറി എം. വെങ്കിടേഷാണ് പുതിയ സഹപ്രഭാരി. പ്രകാശ് ജാവദേക്കർക്ക് പകരം ചുമതല നല്കിയിട്ടില്ല. തമിഴ്നാടിന്റെയും തെരഞ്ഞെടുപ്പ് അടുത്തിരിക്കുന്ന ഉത്തരാഖണ്ഡിന്റെയും ചുമതല ആർ എസ് എസ് നേതാവ് റാം മാധവിനാണ്. ഇതിന് പുറമെ, പുതുച്ചേരിയുടെ ചുമതല കെ സുരേന്ദ്രനും ലക്ഷദ്വീപിന്റെ ചുമതല ജോർജ് കുര്യനും നല്കിയപ്പോള് അനില് ആന്റണിക്ക് നാഗാലാൻഡിന്റെ ചുമതലയും ഗോവയുടെ സഹപ്രഭാരി സ്ഥാനവും നല്കിയിട്ടുണ്ട്.
മറ്റു പ്രധാന സംസ്ഥാനങ്ങളില്, ഉത്തർപ്രദേശിന്റെ ചുമതല വിനോദ് താവ്ഡെയ്ക്കും ഹരിയാനയുടെയും ഛത്തീസ്ഗഡിന്റെയും ചുമതല സ്മൃതി ഇറാനിക്കുമാണ് നല്കിയിരിക്കുന്നത്. ഗുജറാത്ത് പ്രഭാരിയായി തരുണ് ചുഗിനെയും മഹാരാഷ്ട്രയുടെ സഹചുമതലക്കാരനായി അമിത് മാളവ്യയെയും നിയമിച്ചു. പാർട്ടി സംഘടനാ സംവിധാനം ശക്തിപ്പെടുത്തുന്നതിന്റെ ഭാഗമായാണ് വിവിധ സംസ്ഥാനങ്ങളില് പ്രഭാരിമാരുടെയും സഹപ്രഭാരിമാരുടെയും പുതിയ പട്ടിക കേന്ദ്ര നേതൃത്വം പുറത്തിറക്കിയത്.
