ഡൽഹി: വിവിധ സംസ്ഥാനങ്ങളില്‍ നടന്ന ഉപതിരഞ്ഞെടുപ്പുകളുടെ ഫലം പുറത്തുവന്ന് തുടങ്ങുമ്പോള്‍ ബംഗാളില്‍ ബിജെപിക്കും തമിഴ്നാട്ടില് ടിവികെയ്ക്കും ലീഡ്.
പശ്ചിമ ബംഗാളിലെ രണ്ടു സീറ്റുകളിലും ബിജെപി ലീഡ് ചെയ്യുകയാണ്. ബിജെപിക്ക് നന്ദിഗ്രാമില്‍ 1900 വോട്ടിൻറെ ലീഡ് ആണുള്ളത്. കോണ്‍ഗ്രസ് സ്ഥാനാർത്ഥിക്ക് ഇതുവരെ കിട്ടിയത് 18 വോട്ടുകള്‍ മാത്രമാണ്. കൂടാതെ രജിനഗറില്‍ ബിജെപി 900 വോട്ടിൻ്റെ ലീഡുമായി കുതിക്കുകയാണ്.
രണ്ടാം സ്ഥാനത്ത് മമതയുടെ തൃണമൂല്‍ കോണ്‍ഗ്രസ് ആണ്. ബംഗാള്‍ കൂടാതെ അസമിലും ബിജെപിയാണ് മുന്നിലുള്ളത്.
അതേസമയം, തമിഴ്നാട്ടില് ഇഞ്ചോടിഞ്ച് പോരാട്ടമാണ് കാഴ്ച്ചവെക്കുന്നത്. വിജയ്‍യുടെ ടിവികെ രണ്ട് മണ്ഡലങ്ങളിലും മുന്നിലായിരുന്നുവെങ്കിലും നിലവില്‍ ഒരു സീറ്റിലേക്ക് ഒതുങ്ങിയിരിക്കുകയാണ്.
മധുരാന്തകം ടിവികെ ലീഡ് 2000 കടക്കുമ്പോള്‍ ധാരാപുരത്ത് എഐഎഡിഎംകെ 66 വോട്ട് ലീഡ് ചെയ്യുകയാണ്. പശ്ചിമ ബംഗാള്‍, തമിഴ്നാട്, അസം, പുതുച്ചേരി സംസ്ഥാനങ്ങളിലെ ആറ് മണ്ഡലങ്ങളിലെ ജനവിധിയാണ് പുറത്തുവരുന്നത്.
തമിഴ്നാട്, പശ്ചിമ ബംഗാള്‍ സർക്കാരുകള്‍ക്ക് ഫലം നിർണായകമാണ്. തമിഴ്നാട്, പശ്ചിമ ബംഗാള്‍, പുതുച്ചേരി എന്നിവിടങ്ങളിലായി അഞ്ച് നിയമസഭാ സീറ്റുകളിലേക്കും അസമിലെ ഒരു ലോക്‌സഭാ സീറ്റിലേക്കും നടന്ന ഉപതിരഞ്ഞെടുപ്പിന്റെ ഫലമാണ് പുറത്തുവരുന്നത്. തമിഴ്നാട്ടില് മധുരാന്തകം, ധാരാപുരം മണ്ഡലങ്ങള്‍ ആണ് വിധിയെഴുതിയത്. ടി.വി.കെ അധികാരത്തിലെത്തിയ ശേഷമുള്ള നിർണായക ഉപതിരഞ്ഞെടുപ്പാണിത്.
15 വർഷത്തെ തൃണമൂല്‍ കോണ്‍ഗ്രസ് ഭരണത്തിന് ശേഷം ബി.ജെ.പി അധികാരത്തില്‍ വന്ന പശ്ചാത്തലത്തില്‍, പശ്ചിമ ബംഗാളില്‍ നന്ദിഗ്രാം, റെജിനഗർ ഫലങ്ങള്‍ പ്രധാനമാണ്. പുതുച്ചേരിയിലെ തട്ടഞ്ചാവടി നിയമസഭാ മണ്ഡലത്തിലെയും അസമിലെ നൗഗോണ്‍ ലോക്‌സഭാ മണ്ഡലത്തിലെയും വോട്ടെണ്ണലും തുടരുകയാണ്.
