കക്കനാട്: ഇൻഫോപാർക്ക് പോലീസ് സ്റ്റേഷൻ പരിധിയിലെ രാജഗിരി കോളേജിന് സമീപത്ത് നിന്നും സുസുക്കി ആക്സിസ് സ്കൂട്ടർ മോഷണം നടത്തിയ കേസിലെ പ്രതിയെ പോലീസ് അറസ്റ്റ് ചെയ്തു.
കാക്കനാട് പടമുകള്‍ സ്വദേശി എബിൻ പീറ്റർ (36) ആണ് അറസ്റ്റിലായത്.
ഇൻഫോപാർക്ക് പോലീസ് സ്റ്റേഷൻ സബ്ബ് ഇൻസ്പെക്ടർ സനീഷ് റ്റി.എസ്സിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
കഴിഞ്ഞ സെപ്റ്റംബർ 28-ന് ആണ് കേസിനാസ്പദമായ സംഭവം. കാക്കനാട് വില്ലേജ് രാജഗിരി വാലിയില്‍, രാജഗിരി കോളേജിന് സമീപമുള്ള റോഡരികില്‍ പാർക്ക് ചെയ്തിരുന്ന കോതമംഗലം പല്ലാരിമംഗലം സ്വദേശിയുടെ സ്കൂട്ടറാണ് പ്രതി മോഷ്ടിച്ചുകൊണ്ട് പോയത്.
വാഹന ഉടമയുടെ പരാതിയില്‍ ഇൻഫോപാർക്ക് പോലീസ് കേസ് രജിസ്റ്റർ ചെയ്ത് അന്വേഷണം ആരംഭിക്കുകയായിരുന്നു. സംഭവം നടന്ന സ്ഥലത്തിന് സമീപത്തെ സി.സി.ടി.വി ദൃശ്യങ്ങളില്‍ നിന്ന് ലഭിച്ച പ്രതിയുടെ രൂപരേഖ കേന്ദ്രീകരിച്ച്‌ നടത്തിയ സമഗ്രമായ അന്വേഷണമാണ് പ്രതിയിലേക്ക് എത്തിയത്.
പോലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ പ്രതിയുടെ താമസസ്ഥലത്ത് എത്തിയ പോലീസ് സംഘത്തെ ആക്രമിച്ച്‌ രക്ഷപെടാൻ ശ്രമിച്ച എബിൻ പീറ്ററെ പോലീസ് അതിസാഹസികമായി കീഴ്പെടുത്തുകയായിരുന്നു. പ്രതിയുടെ വീടിന് സമീപത്ത് നിന്നും നമ്പർ പ്ലേറ്റ് അഴിച്ചുമാറ്റിയ നിലയില്‍ മോഷണം പോയ സ്കൂട്ടർ പോലീസ് കസ്റ്റഡിയിലെടുത്തു.
സ്കൂട്ടറിന്റെ നമ്പർ പ്ലേറ്റ് അഴിച്ചുമാറ്റി കടത്തിക്കൊണ്ടുപോയി പൊളിച്ചുവില്‍ക്കാനുള്ള ശ്രമമാണ് പോലീസിന്റെ സമയോചിതമായ ഇടപെടലിലൂടെ തകർത്തത്. പ്രതി അന്തർസംസ്ഥാന വാഹന മോഷണ ശൃംഖലയില്‍പ്പെട്ടയാളാണോ എന്ന കാര്യം പോലീസ് പരിശോധിച്ച്‌ വരികയാണ്.
ഇൻഫോപാർക്ക് എസ്.എച്ച്‌.ഒ സനീഷ് റ്റി.എസ്, എസ്.ഐ നജീബ്, എസ്.സി.പി.ഒ അനീഷ് റ്റി.ജെ, സി.പി.ഒ സുജിത് രാജേന്ദ്രൻ, സി.പി.ഒ സുമേഷ് സി.എസ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.
