തിരുവനന്തപുരം: സംസ്ഥാനത്ത് പുതിയ ബാര്‍ ലൈസന്‍സുകള്‍ അനുവദിക്കുന്നതില്‍ കടുപ്പമേറിയ ചട്ടങ്ങളും വ്യവസ്ഥകളും കൊണ്ടുവരാന്‍ ഒരുങ്ങി സര്‍ക്കാര്‍.
ഹോട്ടലുകള്‍ക്ക് സ്റ്റാര്‍ പദവി ലഭിച്ചയുടന്‍ യാതൊരുവിധ മുന്‍ഗണനാ പരിശോധനകളുമില്ലാതെ ബാര്‍ ലൈസന്‍സ് ഓട്ടോമാറ്റിക്കായി നല്‍കുന്ന നിലവിലെ രീതി ഇനി സാധ്യമാകില്ല. നിര്‍ദ്ദിഷ്ട പ്രദേശത്തെ സാമൂഹ്യ ആഘാതവും ജനജീവിതത്തെ ബാധിക്കുന്ന വിഷയങ്ങളും കൃത്യമായി വിലയിരുത്തിയ ശേഷം മാത്രമേ ലൈസന്‍സ് അനുവദിക്കാവൂ എന്ന അടിയന്തര തീരുമാനത്തിന് ഹൈക്കോടതിയുടെ പൂര്‍ണ്ണ അംഗീകാരവും ലഭിച്ചിട്ടുണ്ട്.
കഴിഞ്ഞ സര്‍ക്കാരിന്റെ കാലത്ത് താലൂക്ക് എക്‌സൈസ് ഡെപ്യൂട്ടി കമ്മീഷണര്‍മാര്‍ക്ക് തോന്നിയ പോലെ ബാര്‍ ലൈസന്‍സുകള്‍ നല്‍കാന്‍ അധികാരം നല്‍കിയ സിസ്റ്റത്തിലാണ് ഭരണകൂടം പ്രധാനമായും വെട്ടിത്തിരുത്തലുകള്‍ വരുത്തുന്നത്. മുകള്‍ത്തട്ടിലുള്ള ഉദ്യോഗസ്ഥരോ മന്ത്രിമാരോ അറിയാതെ പ്രാദേശികമായി അപേക്ഷ ലഭിച്ച്‌ 24 മണിക്കൂറിനുള്ളില്‍ ലൈസന്‍സുകള്‍ ഒപ്പിച്ചെടുക്കുന്ന വഴിവിട്ട രീതികള്‍ക്ക് തടയിടുകയാണ് ലക്ഷ്യം. മാര്‍ച്ച്‌ 30 വരെ പുതിയ നയപരമായ പരിശോധനകളുമായി മുന്നോട്ടുപോകാന്‍ കോടതി എക്‌സൈസ് വകുപ്പിന് അനുമതി നല്‍കിയിട്ടുണ്ട്.
വര്‍ഷങ്ങളായി അടഞ്ഞുകിടന്ന സ്ഥാപനങ്ങള്‍ക്കോ വൈന്‍ പാര്‍ലറുകള്‍ക്കോ ഒരു പേപ്പര്‍ കൊടുക്കുമ്പോള്‍ തന്നെ പെട്ടെന്ന് ബാര്‍ ലൈസന്‍സ് നല്‍കുന്നത് ഗുരുതരമായ ഉദ്യോഗസ്ഥ അനാസ്ഥയായാണ് വിലയിരുത്തപ്പെടുന്നത്. ഇതിനുപിന്നില്‍ പ്രവര്‍ത്തിച്ച ഉദ്യോഗസ്ഥര്‍ക്കെതിരെ കേവലം സസ്‌പെന്‍ഷന്‍ നടപടികള്‍ മാത്രമായിരിക്കില്ല ഉണ്ടാകുക. ഇതില്‍ വ്യക്തമായ അഴിമതിയും ഒത്തുകളിയും നടന്നിട്ടുണ്ടോ എന്ന് കണ്ടെത്താന്‍ വിജിലന്‍സ് തല അന്വേഷണത്തിനുള്ള നീക്കങ്ങളും അണിയറയില്‍ സജീവമാണ്.
സര്‍വീസില്‍ നിന്ന് വിരമിച്ച ശേഷം ബാര്‍ ലൈസന്‍സുകള്‍ സംഘടിപ്പിച്ചു നല്‍കാനായി ബ്രോക്കര്‍മാരായി ഇറങ്ങുന്ന മുന്‍ എക്‌സൈസ് ഉദ്യോഗസ്ഥരുടെ നീക്കങ്ങള്‍ തടയാനും അടിയന്തര തീരുമാനമുണ്ട്. വിരമിച്ച ഉദ്യോഗസ്ഥരുടെയും അവരുടെ ഏജന്റുമാരുടെയും വിശ്വസ്തരുടെയും അനധികൃത സ്വത്ത് സമ്പാദ്യവും ആസ്തി വകകളും വിജിലന്‍സിനെക്കൊണ്ട് സമഗ്രമായി അന്വേഷിപ്പിക്കാനാണ് നീക്കം നടക്കുന്നത്.
മുന്‍ എല്‍.ഡി.എഫ് സര്‍ക്കാര്‍ ഉണ്ടാക്കിവെച്ച അശാസ്ത്രീയമായ ലൈസന്‍സിംഗ് രീതികള്‍ പൂര്‍ണ്ണമായും മാറ്റിയെഴുതാനാണ് പുതിയ തീരുമാനം. വ്യവസായ അനുകൂല അന്തരീക്ഷം ഉറപ്പുവരുത്തുമ്പോള്‍ തന്നെ, നാട്ടിലെ സാമൂഹ്യ സുരക്ഷ കാത്തുസൂക്ഷിക്കാന്‍ പ്രാദേശിക പഠനങ്ങള്‍ നിര്‍ബന്ധമാക്കും. വരുംദിവസങ്ങളില്‍ ഈ പുതിയ കടുകട്ടി ചട്ടങ്ങള്‍ ഔദ്യോഗികമായി ഉത്തരവായി പുറത്തിറങ്ങുന്നതോടെ ബാര്‍ ലൈസന്‍സ് വിപണിയിലെ അനധികൃത ഇടനിലക്കാര്‍ക്ക് വലിയ തിരിച്ചടിയാകും
