കോട്ടയം: വർധിച്ചുവരുന്ന ജീവിതച്ചെലവുകൾക്കും തൊഴിൽപരമായ പ്രതിസന്ധികൾക്കുമെതിരെ നവംബർ 12-ന് സംസ്ഥാനത്ത് നടക്കുന്ന
ഓട്ടോറിക്ഷാ തൊഴിലാളി പണിമുടക്കിന് ഓട്ടോ സ്നേഹ കൂട്ടായ്മ (എ എസ്കെ) സംസ്ഥാന കമ്മിറ്റി പൂർണ്ണ ഐക്യദാർഢ്യം പ്രഖ്യാപിച്ചു.
ഇന്ധനവിലയിലെ നിരന്തരമായ വർധനവും സ്പെയർ പാർട്സുകളുടെ വിലക്കയറ്റവും അറ്റകുറ്റപ്പണി
ചെലവുകളും മൂലം കടുത്ത സാമ്പത്തിക ഞെരുക്കത്തിലൂടെയാണ് സാധാരണക്കാരായ ഓട്ടോ തൊഴിലാളികൾ കടന്നുപോകുന്നത്.
ഈ സാഹചര്യത്തിൽ മിനിമം ചാർജ് ഉൾപ്പെടെയുള്ള യാത്രാനിരക്കുകൾ അടിയന്തരമായി വർധിപ്പിക്കാൻ സർക്കാർ തയ്യാറാകണമെന്ന് സംഘടന ആവശ്യപ്പെട്ടു.
ക്ഷേമനിധി ആനുകൂല്യങ്ങളിലെ അപര്യാപ്തതകൾ പരിഹരിക്കുക, മീറ്റർ സീലിംഗുമായി ബന്ധപ്പെട്ട് തൊഴിലാളികൾ നേരിടുന്ന പ്രായോഗിക ബുദ്ധിമുട്ടുകൾ ഒഴിവാക്കുക,
ഫിറ്റ്നസ് ടെസ്റ്റുകളിൽ ഓട്ടോറിക്ഷ തൊഴിലാളികളോട് കാണിക്കുന്ന അവഗണനയും അനാവശ്യ തടസ്സങ്ങളും അവസാനിപ്പിക്കുക
തുടങ്ങിയ ന്യായമായ ആവശ്യങ്ങൾ സർക്കാർ അടിയന്തരമായി പരിഗണിക്കണമെന്ന് ഭാരവാഹികൾ വ്യക്തമാക്കി.
എ.എസ്.കെ സംസ്ഥാന പ്രസിഡന്റ് സുശാന്ത് കോഴിക്കോടിന്റെ അധ്യക്ഷതയിൽ ചേർന്ന യോഗത്തിൽ ജനറൽ സെക്രട്ടറി സന്തോഷ് കോട്ടയം,
ഭാരവാഹികളായ കുഞ്ഞുമോൻ ആലുവ, സന്തോഷ് മുണ്ടക്കയം,
അനീഷ് തലയോലപ്പറമ്പ്, ജോഷി ആപ്പാഞ്ചിറ, മനോജ് വടകര, സുരേഷ് പാലക്കാട് തുടങ്ങിയവർ സംസാരിച്ചു.
