യോഗ ആച്ചി: ഏഷ്യൻ പാര ഗെയിംസില്‍ വീല്‍ചെയർ ബാഡ്മിന്‍റണില്‍ ചരിത്രമെഡല്‍ നേടി മലയാളി താരം ആല്‍ഫിയ ജെയിംസ്. വീല്‍ചെയർ ബാഡ്മിന്‍റണ്‍ ഡബിള്‍സില്‍ ആല്‍ഫിയ ജെയിംസും പല്ലവി കലുഷെഹല്ലിയും അടങ്ങിയ സഖ്യം വെങ്കലം നേടിയാണ് ചരിത്രനേട്ടം സ്വന്തമാക്കിയത്.
ഇന്ത്യൻ വീല്‍ചെയർ ബാഡ്മിന്‍റണിന്‍റെ ചരിത്രത്തില്‍ തന്നെ ആദ്യമായി ലഭിക്കുന്ന മെഡലാണിത്. ആല്‍ഫിയ ജെയിംസ്- പല്ലവി സഖ്യം സെമിയില്‍ ചൈനീസ് സഖ്യമായ ക്സു ടിങ്റ്റിങ് - യാങ് ഫാൻ സഖ്യത്തോട് പരാജയപ്പെട്ടെങ്കിലും,(3-21, 9-21) സെമിയിലെത്തിയതോടെ തന്നെ ഇന്ത്യ വെങ്കല മെഡല്‍ ഉറപ്പിച്ചിരുന്നു. ഗ്രൂപ്പ് മത്സരത്തില്‍ ചൈനയുടെ ലി ജിയാക്വി - ലി ഹോങ്യാൻ സഖ്യത്തെ മറികടന്നാണ് ഇരുവരും സെമിയിലെത്തിയത്.
ചരിത്ര മെഡലിന്‍റെ ഭാഗമായതില്‍ സന്തോഷമുണ്ടെന്ന് ആല്‍ഫിയ ജെയിംസ് ഏഷ്യാനെറ്റ് ന്യൂസിനോട് പറഞ്ഞു. ദൈവം തന്ന രണ്ടാം ജന്മമാണിത്. കെട്ടിടത്തില്‍ നിന്ന് വീണപ്പോള്‍ ജീവിതം അവസാനിച്ചു എന്ന് കരുതി. വലിയ നേട്ടത്തിനായി ജീവിതം തിരിച്ചുകിട്ടി എന്ന വിശ്വാസം ആണ് മുന്നോട്ടുനയിച്ചതെന്നും ആല്‍ഫിയ പറഞ്ഞു. ഏഷ്യൻ ഗെയിംസ് മെഡല്‍ ജേതാക്കള്‍ക്ക് നല്‍കിയ പരിഗണന ഏഷ്യൻ പാര ഗെയിംസ് മെഡല്‍ ജേതാക്കള്‍ക്കും നല്‍കണമെന്നൊരു അഭ്യർത്ഥന സര്‍ക്കാരിനോട് ഉണ്ടെന്നും മുഖ്യമന്ത്രിയെ കാണുക എന്നത് വലിയ ആഗ്രഹമാണെന്നും ആല്‍ഫിയ പറഞ്ഞു. കായികമന്ത്രിയും വിളിക്കുമെന്നാണ് പ്രതീക്ഷിക്കുന്നതെന്നും ആല്‍ഫിയ വ്യക്തമാക്കി.
ബാസ്കറ്റ്ബോള്‍ കോർട്ടില്‍ മിന്നും താരമായി നില്‍ക്കുമ്പോഴാണ് പതിനേഴാം വയസില്‍ ആല്‍ഫിയയെ തോല്‍പിക്കാൻ വിധി ശ്രമിക്കുന്നത്. നാലു നില കെട്ടിടത്തിന്‍റെ മുകളില്‍ നിന്ന് വീണ ആല്‍ഫിയയുടെ നട്ടെല്ലിന് ഗുരുതരമായി പരുക്കേറ്റു. കാലുകളുടെ ചലനശേഷി നഷ്ടമായി. പക്ഷേ തോറ്റു കൊടുക്കാനായിരുന്നില്ല ആല്‍ഫിയയുടെ തീരുമാനം. വീല്‍ചെയറുമായി ആല്‍ഫിയ നേരെ കയറി ചെന്നത് ജിമ്മിലേക്കായിരുന്നു. അവരുടെ പ്രോല്‍സാഹനത്തില്‍ പവർ ലിഫ്റ്റിങ് മല്‍സരരംഗത്തേക്ക്. വീല്‍ ചെയർ കാറ്റഗറിയിലും ഓപ്പണ്‍ കാറ്റഗറിയിലും മെഡലും നേടി. പാരാലിംപിക്സ് പോലുള്ള വലിയ വേദികളില്‍ മല്‍സരിക്കണമെന്ന മോഹമാണ് ആല്‍ഫിയയെ ബാഡ്മിന്‍റണ്‍ കോർ‍ട്ടിലെത്തിച്ചത്. ആദ്യവർഷം തന്നെ വീല്‍ചെയർ ബാഡ്മിന്‍റണില്‍ ദേശീയ ചാംപ്യനെ അട്ടിമറിച്ച്‌ കിരീടം. തുടർച്ചയായി രണ്ട് തവണ ദേശീയ ചാംപ്യനായി.
