തപാല് വകുപ്പില് ജോലി നേടാൻ സുവർണാവസരം. ബ്രാഞ്ച് പോസ്റ്റ്മാസ്റ്റർ, അസിസ്റ്റന്റ് ബ്രാഞ്ച് പോസ്റ്റ്മാസ്റ്റർ, ഡാക് സേവക് എന്നീ തസ്തികകളിലേക്കാണ് ഒഴിവ്. ഇതുസംബന്ധിച്ച വിജ്ഞാപനം ഇന്ത്യ പോസ്റ്റ് പുറത്തിറക്കിയിട്ടുണ്ട്. ഓഗസ്റ്റ് 31 മുതല് സെപ്തംബർ 19 വരെ ഒറ്റത്തവണ രജിസ്ട്രേഷൻ പൂർത്തിയാക്കണം.
സെപ്തംബർ രണ്ട് മുതല് സെപ്തംബർ 21 വരെ ഓണ്ലൈൻ അപേക്ഷകളും ഫീസും സമർപ്പിക്കാവുന്നതാണ്. അപേക്ഷയിലെ വിവരങ്ങള് തിരുത്താനുള്ള അവസരം സെപ്തംബർ 23, 24 തീയതികളില് ലഭ്യമായിരിക്കും.
നിയമനം ലഭിക്കുന്നവർക്ക് ടൈം റിലേറ്റഡ് കണ്ടിന്യൂയിറ്റി അലവൻസ് (ടിഎആർസിഎ) അടിസ്ഥാനമാക്കിയുള്ള വേതനമാണ് ലഭിക്കുക. ഇതില് ബ്രാഞ്ച് പോസ്റ്റ്മാസ്റ്റർമാർക്ക് 12,000 രൂപ മുതല് 29,380 രൂപ വരെയും അസിസ്റ്റന്റ് ബ്രാഞ്ച് പോസ്റ്റ്മാസ്റ്റർ, ഡാക് സേവക് തസ്തികയിലുള്ളവർക്ക് 10,000 രൂപ മുതല് 24,470 രൂപ വരെയും ശമ്പളം ലഭിക്കും.
തിരഞ്ഞെടുക്കപ്പെടുന്ന ഗ്രാമീണ് ടാക് സേവകർക്ക് ടിആർസിഎ വഴിയാണ് ശമ്പളം ലഭിക്കുന്നത്. നിബന്ധനകള്ക്ക് വിധേയമായി ടിആർസിഎയില് പ്രതിവർഷം മൂന്ന് ശതമാനം വർദ്ധനവുണ്ടാകും. കൂടാതെ, ക്ഷാമബത്ത, മറ്റ് അലവൻസുകള്, ജിഡിഎസ് ഗ്രാറ്റുവിറ്റി, സർവീസ് ഡിസ്ചാർജ് ബെനഫിറ്റ് സ്കീം എന്നിവയുള്പ്പെടെയുള്ള സാമൂഹിക സുരക്ഷാ ആനുകൂല്യങ്ങളും ജീവനക്കാർക്ക് ലഭിക്കും.
100 രൂപയാണ് അപേക്ഷാ ഫീസ്. എല്ലാ തസ്തികയിലേക്കും ഇത് ബാധകമാണ്. വനിത, പട്ടികജാതി, പട്ടികവർഗ വിഭാഗത്തില്പ്പെട്ട ഉദ്യോഗാർത്ഥികള്, നിർദിഷ്ട മാനദണ്ഡങ്ങള് പ്രകാരമുള്ള ഭിന്നശേഷിക്കാർ, ട്രാൻസ്വുമണ് വിഭാഗത്തില്പ്പെട്ട അപേക്ഷകർക്ക് പരീക്ഷാ ഫീസില് ഇളവ് നല്കിയിട്ടുണ്ട്. കേന്ദ്ര /സംസ്ഥാന സർക്കാർ/ ഇന്ത്യയിലെ കേന്ദ്രഭരണ പ്രദേശങ്ങള് നടത്തുന്ന അംഗീകൃത സ്കൂള് വിദ്യാഭ്യാസ ബോർഡ് നടത്തുന്ന ഗണിതം, ഇംഗ്ലീഷ് വിഷയങ്ങള് ഉള്പ്പെടുന്ന പത്താം ക്ലാസ് പരീക്ഷ പാസായിരിക്കണം. അപേക്ഷകർക്ക് പ്രാദേശിക ഭാഷയിലും അറിവുണ്ടായിരിക്കണം. 18 മുതല് 40 വയസ് വരെയുള്ളവർക്ക് അപേക്ഷിക്കാം.
