കോഴിക്കോട്: വെള്ളിമാടുകുന്ന് ലോ കോളേജിന് മുന്നില്‍ വിദ്യാർഥികള്‍ക്കിടയിലേക്ക് നിയന്ത്രണംവിട്ട കാർ ഇടിച്ചുകയറി അഞ്ച് പേർക്ക് പരിക്ക്.
ചൊവ്വാഴ്ച രാത്രി കോളേജ് പരിസരത്താണ് അപകടമുണ്ടായത്. പരിക്കേറ്റവരില്‍ ഒരാളുടെ നില ഗുരുതരമായി തുടരുകയാണ്.
മലപ്പുറം സ്വദേശിയായ അബ്ദുല്‍ ഖാദർ, കണ്ണൂർ സ്വദേശി മുഹമ്മദ് സജല്‍, കാസർകോട് സ്വദേശി ശ്രീരാജ്, കണ്ണൂർ സ്വദേശി ജിതിൻ എന്നിവർക്കാണ് പരിക്കേറ്റത്. അഞ്ചാമത്തെ വിദ്യാർഥിയുടെ വിവരങ്ങള്‍ പുറത്തുവന്നിട്ടില്ല.
കാലിക്കറ്റ് സർവകലാശാലയ്‌ക്ക് കീഴിലുള്ള ലോ കോളേജുകളിലെ യൂണിയൻ തെരഞ്ഞെടുപ്പുമായി ബന്ധപ്പെട്ട് കോളേജ് പരിസരത്ത് തോരണം കെട്ടുന്നതിനിടെയാണ് അപകടം. വിദ്യാർഥികള്‍ കൂട്ടമായി നിന്ന് സംസാരിക്കുന്നതിനിടെ നിയന്ത്രണംവിട്ട കാർ ഇവർക്കിടയിലേക്ക് പാഞ്ഞുകയറുകയായിരുന്നു.
ഇടിയുടെ ആഘാതത്തില്‍ അഞ്ച് വിദ്യാർഥികള്‍ക്കും പരിക്കേറ്റു. അപകടം നടന്നയുടൻ വിദ്യാർഥികളും മറ്റുള്ളവരും ചേർന്ന് പരിക്കേറ്റവരെ കോഴിക്കോട് മെഡിക്കല്‍ കോളേജ് ആശുപത്രിയില്‍ എത്തിച്ചു. ഇവരില്‍ ഒരാളുടെ ആരോഗ്യനില ഗുരുതരമാണ്.
കോഴിക്കോട് സ്വദേശിയാണ് കാർ ഓടിച്ചിരുന്നതെന്നാണ് പ്രാഥമിക വിവരം. അപകടത്തിന് പിന്നാലെ കാർ ഡ്രൈവറെ പൊലീസ് കസ്റ്റഡിയിലെടുത്തു.
അപകടത്തിന്റെ കൃത്യമായ കാരണം ഉള്‍പ്പെടെയുള്ള കാര്യങ്ങള്‍ പൊലീസ് പരിശോധിച്ചുവരികയാണ്.
