കൊച്ചി: ചേരാനല്ലൂർ വാഹനാപകടത്തില്‍ പതിനേഴുകാരൻ ഓടിച്ച കാറില്‍ അപകടസമയത്ത് പിതാവായ ജഡ്ജിയും ഉണ്ടായിരുന്നോയെന്ന് സംശയമുള്ളതായി മരിച്ച ജയബാലകൃഷ്ണൻ്റെ കുടുംബം.
17 കാരൻ ഓടിച്ച കാറില്‍ അപകട സമയത്ത് പിതാവായ ജഡ്ജിയും ഉണ്ടായിരുന്നതായി സംശയമെന്ന് ജയബാലകൃഷ്ണന്റെ മകളാണ് അരോപണം ഉന്നയിച്ചത്. ഇതിൻ്റെ സി സി ടി വി ദൃശ്യങ്ങള്‍ പരിശോധിക്കണമെന്നും കാറില്‍ ജഡ്ജിയുടെ ബോർഡ് ഉണ്ടായിരുന്നുവെന്നും കുടുംബം പറയുന്നു. ജഡ്ജിക്കെതിരെ കേസെടുത്തുവെന്ന പൊലീസ് വിശദീകരണത്തില്‍ വിശ്വാസമില്ലെന്നും ജയബാലകൃഷ്ണൻ്റെ മകള്‍.
പ്രതിയെ സംര്ക്ഷിക്കാനുള്ള പൊലീസ് നടപടിക്കെതിരെ വലിയ പ്രതിഷേധമാണ് ഉയർന്ന് വരുന്നത്. പ്രതിയെ ആദ്യം നിസാര വകുപ്പുകള്‍ ചുമത്തി സ്റ്റേഷൻ ജാമ്യത്തില്‍ വിടുകയായിരുന്നു. എന്നാല്‍ ഇതിനെതിരെ പ്രതിഷേധം ഉയർന്നതോടെ പ്രതിക്കെതിരെ നരഹത്യ കുറ്റം ചുമത്തി.
പിന്നീട് കുടുംബം സ്റ്റേഷന് മുന്നില്‍ കുത്തിയിരിപ്പ് സമരം ഉള്‍പ്പെടെ നടത്തിയതിന് ശേഷം പ്രതിയെ കസ്റ്റഡിയിലെടുത്തതായി പൊലീസ് അറിയിക്കുകയായിരുന്നു. എന്നാല്‍ അതില്‍ തങ്ങള്‍ക്ക് വിശ്വാസമായിട്ടില്ലെന്നും കുടുംബം പറയുന്നു.
