തിരുവനന്തപുരം: റേഷൻ കടകളിലെ നീണ്ട ക്യൂ ഒഴിവാക്കി ഭക്ഷ്യധാന്യങ്ങള് എളുപ്പത്തില് ലഭ്യമാക്കുന്നതിനായി പുതിയ സാങ്കേതിക സംവിധാനവുമായി ഭക്ഷ്യവകുപ്പ്.
ബാങ്ക് എടിഎം മാതൃകയില് പ്രവർത്തിക്കുന്ന 'അന്നപൂർത്തി ഗ്രെയിൻ എടിഎം' വഴി ഗുണഭോക്താക്കള്ക്ക് റേഷൻ വിഹിതം കൈപ്പറ്റാം. പദ്ധതിയുടെ ആദ്യഘട്ടം പരീക്ഷണാടിസ്ഥാനത്തില് തിരുവനന്തപുരത്താണ് നടപ്പാക്കുന്നത്.
24 മണിക്കൂറും റേഷൻ സേവനം ലഭ്യമാക്കുകയാണ് ഈ സംവിധാനത്തിലൂടെ ലക്ഷ്യമിടുന്നത്. റേഷൻ വിതരണം കൂടുതല് സുതാര്യവും സൗകര്യപ്രദവുമാക്കുന്നതിന്റെ ഭാഗമായാണ് പുതിയ ചുവടുവയ്പ്പ്.
റേഷൻ കാർഡ് അല്ലെങ്കില് ആധാർ വിവരങ്ങളും ബയോമെട്രിക് വിരലടയാളവും ഉപയോഗിച്ചാണ് യന്ത്രത്തില് നിന്ന് ധാന്യങ്ങള് ശേഖരിക്കേണ്ടത്.
വിവരങ്ങള് കൃത്യമാണെന്ന് ഉറപ്പുവരുത്തിക്കഴിഞ്ഞാല് അഞ്ച് മിനിറ്റിനുള്ളില് ഏകദേശം 50 കിലോ വരെ ധാന്യം നല്കാൻ ഈ എടിഎം യന്ത്രത്തിന് കഴിയും. സമയലാഭത്തിനൊപ്പം കൃത്യമായ അളവില് ധാന്യം ലഭിക്കാനും ഇതിലൂടെ സാധിക്കും.






