കോട്ടയം : സിക്കിമിൽ നിർമാണത്തിലിരുന്ന തുരങ്കത്തിലുണ്ടായ മണ്ണിടിച്ചിലിൽ മരിച്ച കോട്ടയം സ്വദേശിയുടെ മൃതദേഹം നാളെ നാട്ടിലെത്തിക്കും. അനീഷ് മോഹനന്റെ മൃതദേഹം ഇന്ന് രാത്രി 11 മണിയോടെ കൊൽക്കത്തയിൽ നിന്നും എയർ ഇന്ത്യ വിമാന മാർഗം നാട്ടിലേക്ക് പുറപ്പെടും.
തുടർന്ന് നാളെ രാവിലെ 7 മണിയോടെ നെടുമ്പാശ്ശേരിയിൽ എത്തിക്കും. അതിന് ശേഷം രാവിലെ 10 മണിയോടെ ആംബുലൻസിൽ പാമ്പാടി ഗ്രാമ പഞ്ചായത്ത് അതിർത്തിയായ പത്താഴക്കുഴി കൊച്ചുമറ്റത്തെ കൂരോത്തുപറമ്പിൽ വീട്ടിലേക്ക് എത്തിക്കും.
നാളെ ഉച്ചയ്ക്ക് 2 മണിയോടെയാണ് മരണാനന്തര കർമങ്ങൾ ആരംഭിക്കുക. തുടർന്ന് വീട്ടുവളപ്പിലാണ് സംസ്കാരം നടക്കുക. നിലവിൽ സിക്കിമിൽ നിന്നും ബന്ധുക്കളും കമ്പനി അധികൃതരും മൃതദേഹത്തെ അനുഗമിക്കുന്നുണ്ട്.
