ഡബ്ലിൻ: ബ്രിട്ടനും നോര്ത്തേണ് അയര്ലന്ഡുമായി ഒരു സോഷ്യല് സെക്യൂരിറ്റി കോണ്ട്രിബ്യൂഷന് കരാറില് ഇന്നലെ ഇന്ത്യ ഒപ്പിട്ടു.
ഇന്ത്യയുടെ വിദേശകാര്യ സെക്രട്ടറി വിക്രം മിസ്രിയും ഇന്ത്യയിലെ ബ്രിട്ടീഷ് ഹൈക്കമ്മീഷണര് ലിന്ഡി കാമറൂണുമാണ് കരാറില് ഒപ്പിട്ടതെന്ന് വിദേശകാര്യ മന്ത്രാലയം അറിയിച്ചു.
ഇരു രാജ്യങ്ങളിലേയും ജീവനക്കാര്ക്ക്, മറ്റേ രാജ്യത്തേക്ക് താത്ക്കാലിക നിയമനം ലഭിക്കുമ്പോള് ഇരട്ട സോഷ്യല് സെക്യൂരിറ്റി കോണ്ട്രിബ്യൂഷന് നല്കുന്നത് ഒഴിവാക്കാന് ഈ കരാര് സഹായിക്കുമെന്നും മന്ത്രാലയം വിശദമാക്കി.
36 മാസക്കാലം വരെയുള്ള കാലയളവില് ഇന്ത്യയില് ജോലി ചെയ്യുന്ന ബ്രിട്ടീഷ് പൗരന്മാര്ക്കോ ബ്രിട്ടനില് ജോലി ചെയ്യുന്ന ഇന്ത്യന് പൗരന്മാര്ക്കോ ആയിരിക്കും ഇതിന്റെ പ്രയോജനം ലഭിക്കുക.
ഇത് ഇരു രാജ്യങ്ങള്ക്കുമിടയിലെ മൊബിലിറ്റിയെ പ്രോത്സാഹിപ്പിക്കുകയും ഹ്രസ്വകാലയളവില് മറ്റേ രാജ്യത്ത് ജോലിക്കെത്തുന്നവരുടെ സോഷ്യല് സെക്യൂരിറ്റി ഉറപ്പാക്കുകയും ചെയ്യുന്ന ഒന്നാണ്.
ഇന്തോ ബ്രിട്ടന് വ്യാപാര കരാറിന്റെ ഭാഗമാണ് ഈ കരാര് എന്നും മന്ത്രാലയം വ്യക്തമാക്കി.
സമഗ്ര സാമ്പത്തിക വ്യാപാര കരാറിനോടൊപ്പം ഇതും പ്രാബല്യത്തില് വരും.
ഇതനുസരിച്ച്, ഇന്ത്യന് കമ്പനികള് ബ്രിട്ടനിലേക്ക് ജീവനക്കാരെ അയയ്ക്കുമ്പോള് ആദ്യ മൂന്ന് വര്ഷക്കാലം നാഷണല് ഇന്ഷുറന്സ് വിഹിതം നല്കേണ്ടി വരില്ല.
സാധാരണയായി, സ്വന്തം രാജ്യത്തിലെ സാമൂഹ്യ സുരക്ഷാ പദ്ധതികളിലേക്ക് വിഹിതം നല്കുമ്പോഴും, ആതിഥേയ രാജ്യത്തെ പദ്ധതികളിലേക്കും വിഹിതം നല്കേണ്ടതായിട്ടുണ്ട്.
ഇത് പലപ്പോഴും ഇരട്ട വിഹിതം നല്കുന്നതിലാണ് കലാശിക്കാറ്. ഇത് തടയുക എന്നതാണ് ഇന്ത്യയും ബ്രിട്ടനും ഒപ്പുവച്ച ഡുവല് കോണ്ട്രിബ്യൂഷന് കണ്വെന്ഷന്റെ (ഡി സി സി) യുടെ ലക്ഷ്യം.
യു കെയില് താത്ക്കാലിക ചുമതലകളിലുള്ള ഏകദേശം 75,000 ഇന്ത്യാക്കാര്ക്ക് ഇത് പ്രയോജനകരമാകും എന്നാണ് കരുതപ്പെടുന്നത്.
അതുപോലെ ഇന്ത്യന് തൊഴിലാളികള്ക്ക് തൊഴില് നല്കിയിട്ടുള്ള 900 ബ്രിട്ടീഷ് തൊഴിലുടമകള്ക്കും ഇത് പ്രയോജനകരമാകും.
സമാനമായ പ്രയോജനം ഇന്ത്യയില് താത്ക്കാലികമായി ജോലി ചെയ്യുന്ന ബ്രിട്ടീഷ് പൗരന്മാര്ക്കും ലഭിക്കും.
ഇരട്ട കോണ്ട്രിബ്യൂഷന് നല്കാതെ മൂന്ന് വര്ഷം വരെയാണ് ജോലി ചെയ്യാന് കഴിയുക.
ഇതനുസരിച്ച്, ഒരു ഇന്ത്യന് കമ്പനി താത്ക്കാലികമായി ഒരു ജീവനക്കാരനെ ബ്രിട്ടനില് ജോലിക്ക് അയച്ചാല് അയാള് ഇന്ത്യയിലെ എംപ്ലോയീസ് പ്രൊവിഡന്റ് ഫണ്ടില് വിഹിതം നല്കുന്നത് തുടര്ന്നു കൊണ്ടിരിക്കും.
യു കെ നാഷണല് ഇന്ഷുറന്സ് വിഹിതം നല്കേണ്ടതില്ല.
ഇന്ത്യയില് താത്ക്കാലിക ജോലിക്ക് നിയമിക്കപ്പെടുന്ന ബ്രിട്ടീഷുകാര്ക്കും ഇതേ പ്രയോജനം ലഭിക്കും.
അതേസമയം, ഇങ്ങനെ താത്ക്കാലിക ജോലിക്കെത്തുന്നവര് 36 മാസങ്ങള് (3 വര്ഷം) കഴിഞ്ഞും രാജ്യത്ത് തുടര്ന്നാല് ഈ ആനുകൂല്യം ലഭിക്കുകയില്ല.
അവര്ക്ക് ആതിഥേയ രാഷ്ട്രത്തിലെ സോഷ്യല് സെക്യൂരിറ്റി പദ്ധതിയില് വിഹിതം നല്കേണ്ടതായി വരും.
മൂന്ന് വര്ഷക്കാലത്തേക്ക് വിഹിതം നല്കാതിരുന്നാലും, പെന്ഷന്, ഹെല്ത്ത്കെയര് സൗകര്യങ്ങള് എന്നിവ ഇവര്ക്ക് ലഭിക്കും.
അതുപോലെ കുടിയേറ്റ നിയമങ്ങളെയും ഈ പുതിയ കരാര് ബാധിക്കില്ല.
.സ്പോണ്സര്ഷിപ്പ് ഉള്പ്പടെ കുടിയേറ്റത്തിന് ആവശ്യമായ മാനദണ്ഡങ്ങള് എല്ലാം തുടര്ന്നും പാലിക്കേണ്ടതായി വരും.
