പത്തനംതിട്ട: മധ്യതിരുവിതാംകൂറില്‍ പ്രസരണശേഷിയുണ്ടായിരുന്ന ആലപ്പുഴ നിലയവും പ്രവര്‍ത്തനം നിര്‍ത്തിവച്ചതോടെ, ഗ്രാമീണജനതയ്‌ക്ക് 'ആകാശവാണി' അപ്രാപ്യമായി.
സാങ്കേതികത്തകരാറാണ്‌ പ്രതിസന്ധിക്കു കാരണമെന്നാണ്‌ ഔദ്യോഗികവിശദീകരണം. യന്ത്രഭാഗങ്ങള്‍ ലഭ്യമല്ലാത്തതിനാല്‍ പഴയ ഉപകരണങ്ങള്‍ വീണ്ടും പ്രവര്‍ത്തിപ്പിക്കുക എളുപ്പമല്ല. സ്‌പെയര്‍ പാര്‍ട്‌സ് നല്‍കിയിരുന്ന കമ്പനിയും ഇല്ലാതായി.
2020-ല്‍ പ്രസാര്‍ഭാരതി ആകാശവാണി ആലപ്പുഴ നിലയത്തില്‍ നിന്നുള്ള മീഡിയം വേവ്‌ പ്രക്ഷേപണം അവസാനിപ്പിച്ചെങ്കിലും കടുത്ത സമ്മര്‍ദത്തേത്തുടര്‍ന്ന്‌ പുനരാരംഭിച്ചിരുന്നു. 200 കിലോവാട്ട്‌ പ്രസരണി സേവനം അടിയന്തരമായി അവസാനിപ്പിക്കാനും പ്രവര്‍ത്തനക്ഷമമായ യന്ത്രസാമഗ്രികള്‍ മറ്റ്‌ ആകാശവാണി കേന്ദ്രങ്ങളിലേക്ക്‌ മാറ്റാനുമായിരുന്നു അന്നത്തെ ഉത്തരവ്‌.
ആകാശവാണി ആലപ്പുഴ നിലയത്തിന്റെ പ്രക്ഷേപണപരിധി തിരുവനന്തപുരം മുതല്‍ തൃശൂര്‍ വരെയും ലക്ഷദ്വീപിലെ കവരത്തി മുതല്‍ തമിഴ്‌നാട്ടിലെ തിരുനെല്‍വേലി വരെയുമായിരുന്നു.
1943-ല്‍ ശ്രീചിത്തിര തിരുനാള്‍ ബാലരാമവര്‍മ മഹാരാജാവ്‌ തിരുവന്തപുരത്താരംഭിച്ച തിരുവിതാംകൂര്‍ റേഡിയോയുടെ തുടച്ചയായി അരനൂറ്റാണ്ട്‌ മുമ്പാണ്‌ ആലപ്പുഴ നിലയം ആരംഭിച്ചത്‌. കോഴിക്കോട്‌, തൃശൂര്‍ നിലയങ്ങള്‍ അതിനു മുമ്പ്‌ ആരംഭിലച്ചിരുന്നു.
ആലപ്പുഴ നിലയത്തിന്‌ സ്വയംഭരണാവകാശം ഇല്ലായിരുന്നു. തിരുവനന്തപുരം നിലയത്തില്‍ നിന്നുള്ള പരിപാടികള്‍ കൂടുതല്‍ സ്‌ഥലങ്ങളിലേക്ക്‌ എത്തിക്കുകയായിരുന്നു ശേഷി കൂടിയ ആലപ്പുഴ നിലയത്തിന്റെ ചുമതല.
