പത്തനംതിട്ട: അടൂര്‍ കെഎസ്‌ആര്‍ടിസി ബസ് സ്റ്റാന്‍ഡില്‍ ബസ് കയറിയിറങ്ങി വയോധികയ്ക്ക് ഗുരുതരമായി പരിക്കേറ്റു.
കൂടല്‍ സ്വദേശിനി അമ്മിണി (74)ക്കാണ് അപകടത്തില്‍ പരിക്കേറ്റത്. ചവറ-അടൂര്‍-പത്തനംതിട്ട റൂട്ടില്‍ സര്‍വീസ് നടത്തുന്ന പ്രിയദര്‍ശിനി കെഎസ്‌ആര്‍ടിസി ബസാണ് അപകടമുണ്ടാക്കിയത്.
സ്റ്റാന്‍ഡിലേക്ക് ബസ് പെട്ടെന്ന് വളച്ചുകയറ്റുന്നതിനിടെ അപകടം സംഭവിക്കുകയായിരുന്നു. ബസ് ഹോണ്‍ മുഴക്കിയപ്പോള്‍ ഭയന്നുപോയ അമ്മിണി മാറാന്‍ ശ്രമിക്കുന്നതിനിടെ നിയന്ത്രണം വിട്ട് ബസിനടിയിലേക്ക് വീഴുകയായിരുന്നു.
തുടര്‍ന്ന് ബസിന്റെ ടയര്‍ ഇവരുടെ കാലിലൂടെ കയറിയിറങ്ങി. അപകടത്തെ തുടര്‍ന്ന് ബസ് മുന്നോട്ടുപോയതോടെ വയോധികയെ കുറച്ചുദൂരം വലിച്ചിഴച്ചതായും ദൃക്സാക്ഷികള്‍ വ്യക്തമാക്കി.
കാല്‍ ഒടിഞ്ഞുതൂങ്ങിയ നിലയില്‍ നിലത്തുവീണുകിടന്ന ഇവരെ സ്റ്റാന്‍ഡിലുണ്ടായിരുന്ന യാത്രക്കാരും നാട്ടുകാരും ചേര്‍ന്ന് രക്ഷപ്പെടുത്തി. വിവരമറിഞ്ഞ് സ്ഥലത്തെത്തിയ പോലീസും ആംബുലന്‍സ് സംഘവും ചേര്‍ന്ന് പരിക്കേറ്റ വയോധികയെ സമീപത്തെ ആശുപത്രിയിലേക്ക് മാറ്റി. നിലവില്‍ ഇവര്‍ വിദഗ്ധ ചികിത്സയിലാണ്.
തിരക്കേറിയ ബസ് സ്റ്റാന്‍ഡിനുള്ളില്‍ വച്ച്‌ നടന്ന അപകടം യാത്രക്കാര്‍ക്കിടയില്‍ വലിയ ആശങ്കയ്ക്ക് ഇടയാക്കിയിട്ടുണ്ട്. സംഭവത്തോടെ അടൂര്‍ കെഎസ്‌ആര്‍ടിസി ബസ് സ്റ്റാന്‍ഡിലെ സുരക്ഷാ ക്രമീകരണങ്ങളിലെ വീഴ്ചകളെക്കുറിച്ചും ചോദ്യങ്ങള്‍ ഉയരുന്നുണ്ട്.
