മുംബൈ: ഇന്ത്യ വിട്ടുപോകാൻ ആവശ്യപ്പെട്ട് നല്‍കിയ നോട്ടീസിനെതിരെയുള്ള നിയമ പോരാട്ടത്തില്‍ നടൻ ഇമ്രാൻ ഖാന് താല്‍ക്കാലിക ആശ്വാസം.
ഒക്ടോബർ 28-നകം രാജ്യം വിടണമെന്ന നോട്ടീസിനെതിരെ ഇമ്രാൻ ഖാൻ നല്‍കിയ ഹർജിയില്‍ മറുപടി നല്‍കാൻ കൂടുതല്‍ സമയം വേണമെന്ന് കേന്ദ്ര സർക്കാർ ആവശ്യപ്പെട്ടതിനെ തുടർന്ന് ബോംബെ ഹൈക്കോടതി വാദം കേള്‍ക്കുന്നത് നവംബർ 2 ലേക്ക് മാറ്റി.
ഹർജി പരിഗണിക്കുന്നത് വരെ നടനെതിരെ കടുത്ത നടപടികളൊന്നും സ്വീകരിക്കില്ലെന്ന് സർക്കാർ കോടതിയില്‍ ഉറപ്പുനല്‍കി.
ഇമ്രാന് രാജ്യം വിടാൻ ഫോറിനേഴ്സ് റീജിയണല്‍ രജിസ്ട്രേഷൻ ഓഫീസ് (FRRO) നല്‍കിയ കാലാവധി അവസാനിക്കാൻ ഒരു ദിവസം ബാക്കിനില്‍ക്കെയാണ് ഈ നടപടി.
യുഎസ് പൗരനും ഓവർസീസ് സിറ്റിസണ്‍ ഓഫ് ഇന്ത്യ കാർഡ് ഉടമയുമായ ഇമ്രാൻ ഖാൻ, തനിക്ക് നല്‍കിയ നോട്ടീസ് ഏകപക്ഷീയവും സ്വാഭാവിക നീതിക്ക് നിരക്കാത്തതുമാണെന്ന് ചൂണ്ടിക്കാട്ടിയാണ് കോടതിയെ സമീപിച്ചത്.
