പെരുമ്പാവൂർ: എറണാകുളം പെരുമ്പാവൂരില്‍ അതിജീവിതയെ ആക്രമിച്ച പ്രതി കോടതിയുടെ ഒന്നാം നിലയില്‍ നിന്ന് താഴേക്ക് ചാടി ആത്മഹത്യയ്ക്ക് ശ്രമിച്ചു.
അറക്കപടി സ്വദേശി അദിനാൻ ആണ് കോടതി കെട്ടിടത്തില്‍ നിന്ന് ചാടിയത്. കോടതിയില്‍ ഹാജരാക്കാനായി എത്തിച്ചപ്പോഴായിരുന്നു സംഭവം. ഇയാളെ ആശുപത്രിയില്‍ പ്രവേശിപ്പിച്ചു.
ചൊവ്വാഴ്ച വൈകുന്നേരമാണ് സംഭവം. പ്രതി അദിനാനെ കൈവിലങ്ങിലാണ് പെരുമ്പാവൂർ കോടതിയില്‍ എത്തിച്ചത്.
കോടതി മുറിക്ക് മുന്നില്‍ കാത്തുനില്‍ക്കുന്നതിനിടെ പ്രതി കൈവിലങ്ങുമായി ഒന്നാം നിലയില്‍ നിന്ന് താഴേക്ക് ചാടുകയായിരുന്നു. ഉടൻ തന്നെ പൊലീസുകാർ ഓടിയെത്തി പ്രതിയെ തൊട്ടടുത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചു.
പ്രതിക്ക് ഗുരുതര പരിക്കില്ലെന്നാണ് വിവരം. ഇയാളെ സ്കാനിങ്ങിന് വിധേയമാക്കി.
14 വയസ്സുകാരിയെ പീഡിപ്പിച്ച കേസില്‍ പ്രതിയാണ് അദിനാൻ. ഓഗസ്റ്റ് മാസം എട്ടാം തീയതിയാണ് പോക്സോ കേസില്‍ അദിനാൻ അറസ്റ്റിലായത്.
കഴിഞ്ഞ മാസം 18ന് പ്രതിക്ക് ജാമ്യം ലഭിച്ചിരുന്നു. പിന്നീട് അതിജീവിതയുടെ വീട്ടിലെത്തി ആക്രമണം നടത്തുകയായിരുന്നു.
