എറണാകുളം: അമിതവേഗതയിലോടിയ ആഡംബര കാര്‍സ്‌കൂട്ടറില്‍ ഇടിച്ചു കയറി രണ്ട് യുവതികള്‍ ഉള്‍പ്പെടെ മൂന്ന് പേര്‍ ദാരുണമായി കൊല്ലപ്പെട്ട സംഭവത്തില്‍ മുഖ്യപ്രതിയുടെ സുഹൃത്തും പോലീസിന്റെ പിടിയിലായി.
അപകടം നടക്കുമ്പോള്‍ മിനി കൂപ്പര്‍ കാറില്‍ ഒപ്പമുണ്ടായിരുന്ന ആലപ്പുഴ സ്വദേശി നിനവിനെയാണ് നെടുമ്പാശ്ശേരി പോലീസ് കസ്റ്റഡിയിലെടുത്ത് അറസ്റ്റ് ചെയ്തത്.
പ്രതി സുഹൈല്‍ സജീവ് മദ്യലഹരിയില്‍ വാഹനം ഓടിച്ചിട്ടും അത് തടയാന്‍ തയ്യാറാകാതിരുന്നതിനും അപകടത്തിന് കൂട്ടുനിന്നതിനുമാണ് നിനവിനെതിരെ പോലീസ് കേസെടുത്തിരിക്കുന്നത്.
കൊടുംപാതകത്തിന് വഴിയൊരുക്കിയ ഈ സംഭവത്തില്‍ നിയമനടപടികള്‍ കൂടുതല്‍ കര്‍ശനമാക്കാനാണ് പോലീസിന്റെ തീരുമാനം.
ഇന്ന് പുലര്‍ച്ചെ രണ്ട് മണിയോടെയായിരുന്നു നാടിനെ ഞെട്ടിച്ച ഈ ദാരുണമായ അപകടം സംഭവിക്കുന്നത്.
നെടുമ്പാശ്ശേരി വിമാനത്താവളത്തിന് സമീപമുള്ള പ്രശസ്തമായ ഒരു ചായക്കടയില്‍ നിന്ന് ചായ കുടിച്ച ശേഷം സ്‌കൂട്ടറില്‍ അത്താണി ഭാഗത്തേക്ക് യാത്ര തിരിക്കുകയായിരുന്നു ഇജാസ്, ഗോപിക, ദേവിക എന്നിവര്‍.
ഈ സമയത്താണ് അതിവേഗത്തില്‍ പാഞ്ഞെത്തിയ ആഡംബര മിനി കൂപ്പര്‍ കാര്‍ ഇവര്‍ സഞ്ചരിച്ച സ്‌കൂട്ടറിന് പിറകില്‍ അതിശക്തമായി ഇടിച്ചുകയറിയത്.
ഇടിയുടെ ആഘാതത്തില്‍ തെറിച്ച്‌ വീണ മൂന്ന് പേരും സംഭവസ്ഥലത്ത് തന്നെ തല്‍ക്ഷണം മരണപ്പെടുകയായിരുന്നു.
മരിച്ച മൂന്ന് പേരും തൃക്കാക്കരയിലെ പ്രശസ്തമായ 'സുക്കോയ' എന്ന ക്രാഫ്റ്റ് ഷോപ്പിലെ ജീവനക്കാരാണ്. ഇജാസ് കര്‍ണാടക സ്വദേശിയും ഗോപിക പാലക്കാട് സ്വദേശിയും ദേവിക വയനാട് സ്വദേശിയുമാണ്.
ജോലി കഴിഞ്ഞ് മടങ്ങവേയാണ് അപ്രതീക്ഷിതമായി ഈ വന്‍ദുരന്തം ഇവരുടെ ജീവനെടുത്തത്.
അപകടത്തിന് പിന്നാലെ കാര്‍ ഓടിച്ച ഡ്രൈവറെയും ഒപ്പമുണ്ടായിരുന്ന സുഹൃത്തിനെയും ഓടിക്കൂടിയ നാട്ടുകാരാണ് പിടികൂടി പോലീസില്‍ ഏല്‍പ്പിച്ചത്.
വാഹനം ഓടിച്ച പ്രതി സുഹൈല്‍ സജീവ് കടുത്ത മദ്യലഹരിയിലായിരുന്നുവെന്ന് പോലീസ് പിന്നീട് ഔദ്യോഗികമായി സ്ഥിരീകരിച്ചു. പ്രതിക്ക് വെറും 19 വയസ്സ് മാത്രമാണ് പ്രായമുള്ളത്.
അപകടമുണ്ടാക്കിയ മിനി കൂപ്പര്‍ കാര്‍ മണിക്കൂറില്‍ 218 കിലോമീറ്റര്‍ ഭയപ്പെടുത്തുന്ന വേഗതയിലാണ് പാഞ്ഞിരുന്നതെന്ന് പോലീസ് അന്വേഷണത്തില്‍ വ്യക്തമായിട്ടുണ്ട്.
സുഹൈലിന്റെ പിതാവിന്റെ ഉടമസ്ഥതയിലുള്ളതാണ് ഈ ആഡംബര വാഹനം.
അതേസമയം, പ്രതി സുഹൈല്‍ സജീവിന് സംഭവദിവസം മദ്യം നല്‍കിയ ബാറുകള്‍ കണ്ടെത്താനും അവക്കെതിരെ കര്‍ശന നടപടി സ്വീകരിക്കാനും എക്‌സൈസ് മന്ത്രി എം ലിജു sഉത്തരവ് പുറപ്പെടുവിച്ചിട്ടുണ്ട്.
പ്രായപൂര്‍ത്തിയാകാത്ത വിവിധ ബാറുകളില്‍ കയറി 19 വയസുകാരന്‍ സുഹൈല്‍ മദ്യപിച്ചിരുന്നുവെന്ന് കണ്ടെത്തിയതിനെ തുടര്‍ന്നാണ്
ബാര്‍ ഉടമകള്‍ക്കെതിരെ കേസെടുക്കാന്‍ എക്‌സൈസ് കമ്മീഷണര്‍ക്കും എറണാകുളം എക്‌സൈസ് ജോയിന്റ് കമ്മീഷണര്‍ക്കും മന്ത്രി നിര്‍ദേശം നല്‍കിയത്.
വൈദ്യപരിശോധനയ്ക്കായി അങ്കമാലി താലൂക്ക് ആശുപത്രിയില്‍ സുഹൈലിനെ എത്തിച്ചപ്പോള്‍ വന്‍ ജനരോഷമാണ് അവിടെ അരങ്ങേറിയത്.
കൊല്ലപ്പെട്ട യുവാക്കളുടെ സുഹൃത്തുക്കളും നാട്ടുകാരും ചേര്‍ന്ന് പ്രതിയെ കൈയേറ്റം ചെയ്യാന്‍ ശ്രമിക്കുകയുണ്ടായി.
ആശുപത്രിക്ക് പുറത്തുണ്ടായിരുന്ന യുവാവ് പ്രതിയെ മര്‍ദിക്കാന്‍ ശ്രമിച്ചതോടെ സ്ഥലത്ത് നേരിയ സംഘര്‍ഷാവസ്ഥയും രൂപപ്പെട്ടു.
അമിത വേഗതയും അപകടകരമായ ഡ്രൈവിങ്ങും ജീവിത ശൈലിയാക്കി മാറ്റിയ ആളാണ് സുഹൈല്‍ എന്ന് വ്യക്തമാക്കുന്ന തെളിവുകള്‍ പുറത്തുവന്നിട്ടുണ്ട്.
മണിക്കൂറില്‍ 218 കിലോമീറ്റര്‍ വേഗതയില്‍ ഇതേ മിനി കൂപ്പര്‍ കാര്‍ ഓടിക്കുന്നതിന്റെ ദൃശ്യങ്ങള്‍ സുഹൈല്‍ നേരത്തെ സമൂഹമാധ്യമങ്ങളില്‍ അഭിമാനത്തോടെ പങ്കുവെച്ചിരുന്നു.
