തിരുവനന്തപുരം: മിന്നല്‍ ഉള്‍പ്പടെയുള്ള ദീർഘദൂര കെഎസ്‌ആർടിസി ബസുകളില്‍ യാത്രക്കാരുടെ സുരക്ഷ മുൻനിർത്തി സീറ്റ് ബെല്‍റ്റ് ഏർപ്പെടുത്തുന്നത് സർക്കാരിന്‍റെ പരിഗണനയിലാണെന്ന് ഗതാഗത മന്ത്രി സി പി ജോണ്‍ നിയമസഭയില്‍ അറിയിച്ചു.
നിയമസഭയിലെ ചോദ്യോത്തര വേളയില്‍ അബിൻ വർക്കി എംഎല്‍എ ഉയർത്തിയ ചോദ്യത്തിന് മറുപടി നല്‍കുകയായിരുന്നു അദ്ദേഹം.
ദീർഘദൂര സർവീസുകളില്‍ രാത്രികാലങ്ങളില്‍ പുഷ്ബാക്ക് സീറ്റുകള്‍ ഉപയോഗിച്ച്‌ ഉയർന്ന വേഗതയില്‍ സഞ്ചരിക്കുമ്പോള്‍, പെട്ടെന്ന് ബ്രേക്ക് ഇടേണ്ട സാഹചര്യങ്ങളില്‍ യാത്രക്കാർക്ക് അപകടവും പരിക്കുകളും സംഭവിക്കാൻ സാധ്യതയുണ്ടെന്ന് ചൂണ്ടിക്കാട്ടിയായിരുന്നു അബിൻ വർക്കി എംഎല്‍എയുടെ ചോദ്യം. സഡൻ ബ്രേക്ക് ഉപയോഗിക്കുന്ന സമയങ്ങളില്‍ യാത്രക്കാർ നേരിടുന്ന ബുദ്ധിമുട്ടുകള്‍ കണക്കിലെടുത്ത്, ദീർഘദൂര ബസുകളില്‍ സീറ്റ് ബെല്‍റ്റ് നടപ്പിലാക്കുന്നതിനായി സംബന്ധിച്ച്‌ വിവിധ മോഡലുകള്‍ വെച്ചുള്ള പഠനങ്ങള്‍ പുരോഗമിക്കുകയാണെന്നും മന്ത്രി പറഞ്ഞു.
നല്ല നിർദേശമാണ് അബിൻ വർക്കി എംഎല്‍എ മുന്നോട്ട് വെച്ചതെന്നും സീറ്റ് ബെല്‍റ്റ് ഏർപ്പെടുത്തുന്നതിലൂടെ അപകട സാധ്യതകള്‍ വലിയ അളവില്‍ ഒഴിവാക്കാൻ സാധിക്കുമെന്നും മന്ത്രി സി പി ജോണ്‍ കൂട്ടിച്ചേർത്തു. നേരത്തെ കെഎസ്‌ആർടിസി മിന്നല്‍, സ്വിഫ്റ്റ് ബസുകളില്‍ സീറ്റ് ബെല്‍റ്റ് നിർബന്ധമാക്കണമെന്ന് ആവശ്യപ്പെട്ട് സിഎംഡിക്ക് അബിൻ വർക്കി എംഎല്‍എ കത്ത് നല്‍കിയിരുന്നു.
