കൊല്ലം: കൊല്ലം ആശ്രാമം മൈതാനത്തിനു സമീപം വെച്ച് യൂത്ത് കോണ്ഗ്രസ് പ്രവർത്തകർ കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ കരിങ്കൊടി കാട്ടി.
പ്രവർത്തകരെ പൊലീസ് അറസ്റ്റുചെയ്ത് നീക്കി.
ആശ്രാമം മൈതാനത്ത് ഹെലികോപ്ടറില് ഇറങ്ങിയ അമിത് ഷാ റോഡുമാർഗം നിർദ്ദിഷ്ട പരിപാടികള്ക്കായി പോകുമ്പോഴാണ് കരിങ്കൊടിയുമായി യൂത്ത്കോണ്ഗ്രസ് പ്രവർത്തകർ വാഹനവ്യൂഹത്തിനു മുന്നിലേക്ക് ചാടി വീണത്. കഴിഞ്ഞ ദിവസം ഡല്ഹിയില് നടന്ന പ്രതിഷേധത്തിനു തുടർച്ചയെന്നോണം 'കേന്ദ്രസർക്കാർ ജനാധിപത്യത്തെ കശാപ്പു ചെയ്യുന്നു', അമിത് ഷാ ഗോ ബാക്ക്' തുടങ്ങിയ മുദ്രാവാക്യങ്ങള് വിളിച്ചായിരുന്നു യൂത്ത് കോണ്ഗ്രസ് നേതാവ് ബിനു ചുള്ളിയിലിന്റെ നേതൃത്വത്തിലുള്ള പ്രതിഷേധം.
കൊല്ലത്ത് സഹകരണ സംരംഭങ്ങളുടെ ഉദ്ഘാടനത്തിനും മാതാ അമൃതാനന്ദമയിയുടെ പിറന്നാള് ആഘോഷത്തിന്റെ ഉദ്ഘാടന പരിപാടിക്കുമാണ് കേന്ദ്ര ആഭ്യന്തരമന്ത്രി എത്തിയത്. അമിത്ഷാ എത്തുന്നതു കാരണം ധാരാളം ബിജെപി പ്രവർത്തരും സ്ഥലത്തുണ്ടായിരുന്നു. പ്രതിഷേധം മൂർച്ഛിച്ചപ്പോള് ബിജെപി പ്രവർത്തകർ ഇടപെടാൻ ശ്രമിച്ചു. എന്നാല്, പൊലീസിന്റെ സമയോചിത ഇടപെടല് കാരണം വലിയൊരു സംഘർഷം ഒഴിവാകുകയായിരുന്നു.
