തിരുവനന്തപുരം: ദേശാഭിമാനിയിലെ 'കള്ളന് വിജയന്' എന്ന വിവാദ ലേഖനത്തിന്റെ ഞെട്ടല് മാറും മുന്പേ പാര്ട്ടി ചാനലിലെ മുതിര്ന്ന മാധ്യമപ്രവര്ത്തകന്റെ പരസ്യ ഉപദേശം സിപിഎമ്മിനെ വന് പ്രകമ്പനത്തിലേക്ക് തള്ളിവിട്ടിരിക്കുകയാണ്.
കൈരളി ടിവി ന്യൂസ് എഡിറ്റര് ഷമ്മി പ്രഭാകറിന്റെ ഫെയ്സ്ബുക്ക് പോസ്റ്റില് പ്രതിപക്ഷ നേതാവ് പിണറായി വിജയന് കടുത്ത രോഷം രേഖപ്പെടുത്തി. പാര്ട്ടി നിയന്ത്രണത്തിലുള്ള മാധ്യമസ്ഥാപനത്തിലെ ഉത്തരവാദപ്പെട്ട സ്ഥാനത്തിരിക്കുന്ന വ്യക്തിയില് നിന്ന് ഇത്തരം ഒരു തുറന്നെഴുത്ത് ഉണ്ടായത് എ.കെ.ജി സെന്ററിനെയും ചൊടിപ്പിച്ചിട്ടുണ്ട്. ഇതേത്തുടര്ന്ന് എ.കെ.ജി സെന്റര് നേതൃത്വം കൈരളി ടിവി മാനേജിംഗ് ഡയറക്ടര് ജോണ് ബ്രിട്ടാസ് എം.പിയെ വിളിച്ച് കടുത്ത അതൃപ്തി നേരിട്ട് അറിയിച്ചു കഴിഞ്ഞു. വിവാദ പോസ്റ്റ് ഷമ്മി ഫെയ്സ് ബുക്കില് നിന്നും പിന്വലിച്ചു.
നിയമസഭാ തിരഞ്ഞെടുപ്പിലെ കനത്ത തോല്വിക്ക് പിന്നാലെ ഭരണവിരുദ്ധ തരംഗവും ജനവികാരവും അംഗീകരിക്കാന് പിണറായി വിജയന് വിമുഖത കാണിക്കുന്നുവെന്നായിരുന്നു ഷമ്മി പ്രഭാകറിന്റെ പ്രധാന ആക്ഷേപം. പുതിയ തലമുറയ്ക്ക് വഴിമാറിക്കൊടുക്കാതെ അധികാരത്തില് കടിച്ചുതൂങ്ങുന്ന സമീപനമാണ് അദ്ദേഹത്തിന്റേതെന്നും പോസ്റ്റില് കടുത്ത ഭാഷയില് കുറ്റപ്പെടുത്തുന്നുണ്ട്. 'ഞാന് തന്നെ വേണമോ അതോ പുതിയ തലമുറ വരണമോ' എന്ന് സ്വയം ചിന്തിക്കാന് പിണറായി വിജയന് തയ്യാറാകണമെന്നാണ് അദ്ദേഹം കുറിച്ചത്. ഒരു തിരഞ്ഞെടുപ്പ് തോല്വി കൊണ്ട് ആരും തള്ളിപ്പറയില്ലെങ്കിലും തോല്വിയുടെ കാരണങ്ങള് തിരിച്ചറിയാന് പിണറായിക്ക് കഴിയുന്നില്ലെന്ന് ചൂണ്ടിക്കാട്ടുന്ന പോസ്റ്റ് വലിയ ചര്ച്ചയായിട്ടുണ്ട്.
മുന്പ് ദേശാഭിമാനി വാരാന്ത്യ പതിപ്പില് വന്ന 'കള്ളന് വിജയന്' എന്ന ലേഖന വിവാദം പാര്ട്ടിക്ക് വലിയ നാണക്കേടുണ്ടാക്കിയിരുന്നു. അന്നത്തെ വിവാദത്തിന് പിന്നാലെ വാരാന്ത്യപതിപ്പിന്റെ ചുമതലക്കാരനായ കെ.ആര്. അജയന് പാര്ട്ടി നിര്ദ്ദേശപ്രകാരം ജോലി രാജിവെച്ച് ഇറങ്ങേണ്ടി വന്നിരുന്നു. സമാനമായ ഒരു അച്ചടക്ക നടപടിയിലേക്കാണ് കൈരളി ടിവിയിലെ കാര്യങ്ങളും ഇപ്പോള് നീങ്ങിക്കൊണ്ടിരിക്കുന്നത്. ദേശാഭിമാനി മോഡലില് ഷമ്മി പ്രഭാകറിനോടും കൈരളി ടിവി മാനേജ്മെന്റ് വിശദീകരണം തേടാനും രാജിവെപ്പിച്ചു പുറത്താക്കാനും സാധ്യതയേറെയാണ്.
വിവാദ പോസ്റ്റ് പുറത്തുവന്നതിന് തൊട്ടുപിന്നാലെ കൈരളി ടിവി ആസ്ഥാനത്ത് അടിയന്തിര യോഗങ്ങള് ചേര്ന്നതായാണ് റിപ്പോര്ട്ടുകള്. പിണറായി വിജയന് നേരിട്ട് രോഷം പ്രകടിപ്പിക്കുകയും എ.കെ.ജി സെന്റര് കടുത്ത ഭാഷയില് ഇടപെടുകയും ചെയ്തതോടെ മാനേജ്മെന്റ് വന് സമ്മര്ദ്ദത്തിലാണ്. ചാനലിന്റെ പ്രതിച്ഛായയെയും പാര്ട്ടി ബന്ധത്തെയും ബാധിക്കുന്ന വിഷയം എന്ന നിലയില് ഇതിനെ നിസ്സാരമായി കാണാന് ജോണ് ബ്രിട്ടാസിനും കഴിയില്ല. ഈ സാഹചര്യത്തില് ഷമ്മി പ്രഭാകറിന് മേല് അച്ചടക്ക വാള് വീഴുമെന്നും അദ്ദേഹത്തിന്റെ പണി തെറിക്കുമെന്നുമാണ് പുറത്തുവരുന്ന സൂചനകള്.
അഞ്ച് വര്ഷം പ്രതിപക്ഷത്തിരുന്ന് പോരാടിയാല് മാത്രമേ പാര്ട്ടിക്ക് കരുത്ത് വീണ്ടെടുക്കാന് കഴിയൂ എന്ന യാഥാര്ത്ഥ്യം ഉള്ക്കൊള്ളാന് നേതൃത്വം മടിക്കുകയാണെന്ന് പോസ്റ്റില് പറയുന്നു. താന് തന്നെ വേണമെന്ന ചിന്ത പിണറായിക്ക് പൊതുസമൂഹം നല്കിയ എല്ലാ മഹത്വങ്ങളും ഇല്ലാതാക്കിയെന്നും അദ്ദേഹം രൂക്ഷമായി വിമര്ശിച്ചിരുന്നു. തിരഞ്ഞെടുപ്പ് പരാജയത്തിന് ശേഷം താഴെത്തട്ടിലെ അണികള്ക്കിടയില് പുകയുന്ന അമര്ഷമാണ് ഈ വാക്കുകളിലൂടെ പുറത്തുവന്നത്. പാര്ട്ടി അനുകൂലികളില് നിന്ന് തന്നെ ഇത്തരം വിമര്ശനങ്ങള് ഉയര്ന്നത് സംസ്ഥാന നേതൃത്വത്തെ കൂടുതല് പ്രതിരോധത്തിലാക്കിയിരിക്കുകയാണ്.
പോസ്റ്റിന് താഴെ ഷമ്മി പ്രഭാകര് തന്നെ കുറിച്ച കമന്റുകളാണ് എ.കെ.ജി സെന്ററിനെ കൂടുതല് പ്രകോപിപ്പിച്ചത്. നരേന്ദ്ര മോദി, രാഹുല് ഗാന്ധി, അടല് ബിഹാരി വാജ്പേയി തുടങ്ങിയ ദേശീയ നേതാക്കളുടെ വ്യക്തിപരമായ ത്യാഗങ്ങളെ അദ്ദേഹം കമന്റുകളില് പുകഴ്ത്തിയിരുന്നു. ഇത്തരം ഉപമകള് ഒരു ഇടത് ചാനലിന്റെ ന്യൂസ് എഡിറ്ററുടെ ഭാഗത്തുനിന്ന് ഉണ്ടായത് പാര്ട്ടി സൈബര് ഗ്രൂപ്പുകളില് വന് പ്രതിഷേധത്തിന് ഇടയാക്കി. കമ്മ്യൂണിസ്റ്റ് ആശയങ്ങള്ക്ക് വിരുദ്ധമായ ഇത്തരം പരാമര്ശങ്ങള് തികഞ്ഞ അച്ചടക്കലംഘനമായാണ് പാര്ട്ടി വിലയിരുത്തുന്നത്.
സ്വന്തം ഭാര്യയെ ഉപേക്ഷിച്ച് രാഷ്ട്രീയ സേവനത്തിനിറങ്ങിയ നരേന്ദ്ര മോദിയുടെ നിലപാടിനെ ഷമ്മി പ്രഭാകര് കമന്റില് പ്രശംസിച്ചിരുന്നു. വിവാഹം കഴിക്കാതെ പൊതുപ്രവര്ത്തനത്തിനായി സമയം മാറ്റിവെച്ച രാഹുല് ഗാന്ധിയുടെ ത്യാഗമനോഭാവത്തെയും അദ്ദേഹം എടുത്തു കാണിച്ചു. രാഷ്ട്രസേവനമെന്നത് വലിയ സ്വയം ത്യാഗമാണെന്ന വാദം ഉന്നയിക്കാനാണ് അദ്ദേഹം ദേശീയ നേതാക്കളെ മാതൃകയാക്കി ഉദ്ധരിച്ചത്. എന്നാല് സംഘപരിവാര്, കോണ്ഗ്രസ് നേതാക്കളെ പുകഴ്ത്തിയുള്ള ഈ പരാമര്ശങ്ങള് കമ്മ്യൂണിസ്റ്റ് അണികള്ക്ക് ഒട്ടും ദഹിച്ചിട്ടില്ല.
കൊട്ടാരക്കര സ്വദേശിയായ ഷമ്മി പ്രഭാകര് മുന് ധനമന്ത്രി കെ.എന്. ബാലഗോപാലുമായി അടുത്ത ബന്ധം പുലര്ത്തുന്ന വ്യക്തിയാണ്. അതിനാല് തന്നെ പാര്ട്ടിയിലെ ഏതെങ്കിലും പ്രബല വിഭാഗത്തിന്റെ നിശ്ശബ്ദ പിന്തുണയോടെയാണോ ഈ തുറന്നെഴുത്ത് എന്ന സംശയവും ഉയരുന്നുണ്ട്. പാര്ട്ടിയില് പിണറായി വിജയനെതിരെ പുതിയ ചേരി രൂപപ്പെടുന്നുവെന്ന സൂചനകള്ക്കിടയിലാണ് ഈ സംഭവം നടക്കുന്നത്. ഈ ആഭ്യന്തര ബന്ധങ്ങളും സംശയങ്ങളും വിഷയത്തിന്റെ ഗൗരവം വര്ദ്ധിപ്പിക്കുന്നുണ്ട്.
തിരഞ്ഞെടുപ്പ് തിരിച്ചടിക്ക് ശേഷം പാര്ട്ടിയിലും പോഷക സംഘടനകളിലും നേതൃത്വത്തിനെതിരെ രൂപപ്പെട്ട അമര്ഷത്തിന്റെ പ്രതിഫലനമാണിത്. ഭരണം നഷ്ടപ്പെട്ടിട്ടും തെറ്റുതിരുത്താന് തയ്യാറാകാത്ത പിണറായി വിജയന്റെ ശൈലിയോട് അണികള്ക്ക് കടുത്ത എതിര്പ്പുണ്ട്. പാര്ട്ടിയുടെ പരമ്പരാഗത വോട്ട് ബാങ്കുകളില് വിള്ളല് വീണിട്ടും പുതിയ തലമുറയ്ക്ക് വഴിമാറാത്തതാണ് തിരിച്ചടിയായതെന്ന് നിരീക്ഷകര് പറയുന്നു. ഷമ്മി പ്രഭാകറിന്റെ പരസ്യ പ്രതികരണം വരും ദിവസങ്ങളില് പാര്ട്ടിയില് വലിയ കൊടുങ്കാറ്റായി മാറും.
ദേശാഭിമാനിയില് കെ.ആര്. അജയന്റെ രാജി വാങ്ങി തടിതപ്പിയതുപോലെ കൈരളി ടിവിയിലും അതേ നാടകം ആവര്ത്തിക്കുമെന്നാണ് കരുതപ്പെടുന്നത്. ഷമ്മി പ്രഭാകറിനോട് ഉടന് തന്നെ രാജിക്കത്ത് ആവശ്യപ്പെടാന് മാനേജ്മെന്റ് നിര്ബന്ധിതമായിരിക്കുകയാണ്. വരുന്ന ദിവസങ്ങളില് കൈരളി മാനേജ്മെന്റ് സ്വീകരിക്കുന്ന നടപടികള് പാര്ട്ടിയിലെ ആഭ്യന്തര തര്ക്കങ്ങളുടെ ആഴം വ്യക്തമാക്കും. എന്തായാലും സിപിഎമ്മിനെയും പിണറായി വിജയനെയും പ്രതിരോധത്തിലാക്കിയ ഈ ഫെയ്സ്ബുക്ക് പോസ്റ്റ് കൈരളി ടിവിയില് വന് അഴിച്ചുപണിക്ക് വഴിവെക്കും.
