.ഡൽഹി:ഹിമാചല്‍ പ്രദേശിലെ ബിലാസ്പൂരിനെ മണാലി വഴി ലഡാക്കിലെ ലേയുമായി ബന്ധിപ്പിക്കുന്ന 489 കിലോമീറ്റർ നീളമുള്ള ബ്രോഡ്‌ഗേജ് റെയില്‍പാതയിലൂടെ വമ്പൻ ചരിത്രനേട്ടത്തിനൊരുങ്ങുകയാണ് ഇന്ത്യ.
ഏകദേശം 1.31 ലക്ഷം കോടി രൂപ ചെലവ് പ്രതീക്ഷിക്കുന്ന ഈ തന്ത്രപ്രധാന പദ്ധതി പൂർത്തിയാകുന്നതോടെ, സമുദ്രനിരപ്പില്‍ നിന്ന് 5,256 മീറ്റർ (17,244 അടി) ഉയരത്തില്‍ നിർമ്മിക്കുന്ന ലഡാക്കിലെ ‘തംഗ്ലാങ് ലാ’ ലോകത്തിലെ ഏറ്റവും ഉയരത്തിലുള്ള റെയില്‍വേ സ്റ്റേഷനായി മാറും. ഇതോടെ 5,068 മീറ്റർ ഉയരത്തിലുള്ള ചൈനയുടെ ക്വിങ്ഹായ്-ടിബറ്റ് റെയില്‍വേയിലെ തംഗുല സ്റ്റേഷന്റെ റെക്കോർഡാണ് ഇന്ത്യ മറികടക്കുക. സുന്ദർനഗർ, മാണ്ഡി, മണാലി, കീലോംഗ്, സർച്ചു തുടങ്ങി പ്രധാന കേന്ദ്രങ്ങളിലൂടെ കടന്നുപോകുന്ന പാതയുടെ പകുതിയിലധികം ദൂരവും (270 കി.മീ) ഏകദേശം 60-ഓളം തുരങ്കങ്ങളിലൂടെയായിരിക്കും. അതിശൈത്യവും ഓക്സിജൻ കുറവും മറികടക്കാൻ വിമാനങ്ങളിലേതിന് സമാനമായി ഓക്സിജൻ അളവ് ക്രമീകരിക്കുന്ന പ്രഷറൈസ്ഡ് കോച്ചുകളായിരിക്കും ഈ പാതയില്‍ ഉപയോഗിക്കുക.
പ്രതിരോധ മന്ത്രാലയം ‘തന്ത്രപ്രധാന പദ്ധതി’യായി പ്രഖ്യാപിച്ചിട്ടുള്ള ഈ റെയില്‍പാത, ചൈനീസ് അതിർത്തിയിലെ യഥാർത്ഥ നിയന്ത്രണ രേഖയിലേക്ക് വർഷം മുഴുവൻ തടസ്സമില്ലാതെ സൈനികരെയും യുദ്ധോപകരണങ്ങളെയും എത്തിക്കാൻ ഇന്ത്യയ്ക്ക് കരുത്തുപകരും. നിലവില്‍ കനത്ത മഞ്ഞുവീഴ്ച കാരണം നവംബർ മുതല്‍ മെയ് വരെ ആറുമാസക്കാലം ശ്രീനഗർ-ലേ, മണാലി-ലേ ഹൈവേകള്‍ അടഞ്ഞുകിടക്കുന്നത് സൈന്യത്തിന് വലിയ വെല്ലുവിളിയാണ്. പുതിയ റെയില്‍പാത വരുന്നതോടെ പ്രത്യേക ഫ്ലാറ്റ് വാഗണുകളില്‍ നൂറുകണക്കിന് യുദ്ധടാങ്കുകളും പീരങ്കികളും ഇന്ധനവും ദിവസങ്ങള്‍ക്ക് പകരം മണിക്കൂറുകള്‍ക്കുള്ളില്‍ ലേയില്‍ എത്തിക്കാനാകും. ശൈത്യകാലത്തേക്ക് വേണ്ട ലക്ഷക്കണക്കിന് ടണ്‍ അവശ്യവസ്തുക്കള്‍ മുൻകൂട്ടി സംഭരിക്കേണ്ട ഭാരവും ചെലവേറിയ വ്യോമമാർഗ്ഗമുള്ള ചരക്കുനീക്കവും ഇതോടെ ഒഴിവാകും.
ടിബറ്റില്‍ ചൈന വിപുലമായ റെയില്‍വേ ശൃംഖല നിർമ്മിച്ച്‌ അതിർത്തിയിലേക്ക് സൈനിക നീക്കം എളുപ്പമാക്കിയ സാഹചര്യത്തില്‍, ഈ പദ്ധതി ഇന്ത്യയ്ക്ക് നിർണ്ണായകമായ പ്രതിരോധ കവചമാണ്. പ്രതിരോധ നേട്ടങ്ങള്‍ക്ക് പുറമെ, ശൈത്യകാലത്ത് ഒറ്റപ്പെട്ടുപോകുന്ന ലഡാക്ക്, ലാഹൗള്‍-സ്പിതി മേഖലകളിലെ ജനങ്ങള്‍ക്ക് വർഷം മുഴുവൻ ഗതാഗത സൗകര്യം ലഭിക്കാനും അവശ്യസാധനങ്ങളുടെ വിലക്കയറ്റം കുറയ്ക്കാനും ടൂറിസം-തൊഴില്‍ മേഖലകളില്‍ കുതിച്ചുചാട്ടമുണ്ടാക്കാനും ഈ പദ്ധതി വഴിയൊരുക്കും.
എങ്കിലും, ഭൂമിശാസ്ത്രപരമായ സങ്കീർണ്ണതകളും അതിശൈത്യവും കാരണം ഇന്ത്യൻ റെയില്‍വേയുടെ ചരിത്രത്തിലെ ഏറ്റവും വലിയ വെല്ലുവിളികളിലൊന്നാണ് ഈ നിർമ്മാണം. അതീവ ഭൂകമ്പ സാധ്യതയുള്ള ഹിമാലയൻ മേഖലയിലെ തുരങ്ക നിർമ്മാണം ഉരുള്‍പൊട്ടലിനും ഹിമാനികളുടെ നാശത്തിനും കാരണമായേക്കാമെന്ന ആശങ്കയും, മഞ്ഞുറഞ്ഞ മണ്ണില്‍ പാളങ്ങള്‍ സ്ഥാപിക്കുന്നതിലെ സാങ്കേതിക ബുദ്ധിമുട്ടുകളും മറികടക്കേണ്ടതുണ്ട്. കൊടുംതണുപ്പില്‍ കോണ്‍ക്രീറ്റ് ഉറയ്ക്കാൻ ചൂടുവെള്ളവും പ്രത്യേക കെമിക്കലുകളും ഉപയോഗിക്കേണ്ടി വരുന്നതും, ഓക്സിജൻ കുറവ് കാരണം നിർമ്മാണ യന്ത്രങ്ങളുടെ പ്രവർത്തനക്ഷമത 40 ശതമാനം വരെ കുറയുന്നതും നിർമ്മാണച്ചെലവ് ഇനിയും ഉയർത്തിയേക്കാം. ജനസംഖ്യ കുറഞ്ഞ മേഖലയായതിനാല്‍ യാത്രക്കാരില്‍ നിന്നുള്ള വരുമാനം കൊണ്ട് മുടക്കുമുതല്‍ തിരിച്ചുപിടിക്കുക പ്രയാസമായതിനാല്‍ പ്രതിരോധ മന്ത്രാലയത്തിന്റെ ഫണ്ടിംഗിനെയാണ് പദ്ധതി പ്രധാനമായും ആശ്രയിക്കുന്നത്.
2016-17 കാലഘട്ടത്തില്‍ പ്രാരംഭ നടപടികള്‍ ആരംഭിച്ച പദ്ധതിയുടെ ആദ്യ ഘട്ടമായ പഞ്ചാബിലെ ഭാനുപ്പള്ളി മുതല്‍ ബിലാസ്പൂർ വരെയുള്ള (63.1 കി.മീ) പാതയുടെ നിർമ്മാണം നിലവില്‍ പുരോഗമിക്കുകയാണ്. ബിലാസ്പൂർ മുതല്‍ ലേ വരെയുള്ള 489 കിലോമീറ്റർ പാതയുടെ അന്തിമ ലൊക്കേഷൻ സർവേയും വിശദമായ പദ്ധതി രേഖയും ഇതിനോടകം പൂർത്തിയായിട്ടുണ്ട്. എന്നാല്‍ 1.31 ലക്ഷം കോടി രൂപയുടെ ഈ ബൃഹത് പദ്ധതിയുടെ നിർമ്മാണത്തിന് കേന്ദ്ര മന്ത്രിസഭയുടെ അന്തിമ സാമ്പത്തിക അനുമതി ഇതുവരെ ലഭിച്ചിട്ടില്ല. വിവിധ മന്ത്രാലയങ്ങളുടെ പരിസ്ഥിതി-സാങ്കേതിക അനുമതികള്‍ക്ക് ശേഷമായിരിക്കും നിർമ്മാണ തീയതി ഔദ്യോഗികമായി പ്രഖ്യാപിക്കുക.
